Lazournen Enternasyonal bann madanm le 8 Mars |01 March 2021

Priscilla Barbe i fyer son travay konman pier master

Lemonn pou selebre Lazournen Enternasyonal bann Madanm le 8 Mars e zournal Seychelles NATION in zwenn avek Minister Lapes ek Lekonomi Ble pour anmenn zot en seri lartik ki met an valer bann madanm ki pe travay dan sa de sekter.

Non: Priscilla Barbe

Metye: Pier Master

Lorganizasyon travay: Lotorite Por Sesel

Alokazyon Lazournen Enternasyonal bann Madanm le 8 Mars, Minister Lapes ek Lekonomi Ble pe servi sa loportinite pour promouvwar bann madanm Seselwa ki pe travay dan sekter lapes ek maritim dan pei.

Dan sa enn edisyon nou konn plis lo Priscilla Barbe, en madanm dan son 50enn lannen ki’n ariv ran Pier Master kot Lotorite Por Sesel. Se li ki pe zer bann aktivite por lo lasose Inter Island Quay, landrwa kot laplipar bann aktivite komers e transportasyon ant bann zil pros i ganny fer.

Sa lannen, Madanm Barbe pe al ganny 11-an depi ki i pe travay avek Lotorite Por Sesel. I ti konmans konman en zofisye sekirite avek sa lorganizasyon, me gras a sipor e lankourazman ki in gannyen avek son bann koleg osi byen ki bann dirizan dan por, in servi bann loportinite ki’n vin a son laporte. Letan lavertisman dan por ti ganny fer pour pozisyon asistan Pier Master, Madanm Barbe pa ti ezite pour li anvoy son laplikasyon, e san ezitasyon i ti ganny aksepte pour li fer sa louvraz.

Me i pa ti fini la ; 2-an pase i ti ganny prezante avek en lot loportinite pour li pran responsabilite Pier Master. I ti aksepte pour fer sa louvraz avek gran lafyerte vi ki i premye e sel madanm dan Sesel ziska prezan ki en Pier Master.

«Mon vreman apresye ki mon’n ariv nivo en Pier Master akoz sa louvraz i enn ki tre dominan alors mon’n pare pour mwan compete avek bann msye pour montre zot ki i annan bann madanm ki kapab fer sa louvraz e sanmenm sa ki mon’n pran sa challenge,» Madanm Barbe i dir.

«Mon louvraz konman en Pier Master…ler bann bato i koste i annan en berthing fee ki bezwen ganny peye, nou bezwen fer rantre tou bann keksoz lo sa papye, keler bato in arive e keler bann depar bato. E avan bann depar bato i annan bann loading ki nou bezwen egzaminen akoz tou bato i annan en loading line. Alors si sa loading line i balanse, par egzanp si sa delo i par anba sa loading line…la bato i ganny clearance akoz nou satisfe ki in fer byen son loading e i kapab fer son depar,»Madanm Barbe i azoute.

Priscilla Barbe i en madanm ki annan en gran lantouzyazm pour sa louvraz ki i pe fer e pour li sa i en kalite ki vin natirelman ler ou kontan e apresye ou louvraz. Se pourtan avan i zwenn Lotorite Por Sesel, i ti travay dan sekter aviasyon konman en sekirite avek en lakonpannyen prive kot Erport Enternasyonal Sesel, Pointe Larue. Sa tranzisyon pour li sorti dan laviasyon pour al travay dan por pa ti difisil e konplike akoz i dir ki se son leker ki’n anmenn li kot i été ozordi.

«Pour mwan mon ti touzour dir e reve ki en zour mon anvi travay avek Lotorite Por Sesel…mon vreman fyer konman en madanm ki ozordi mon’n ariv sa nivo, ki mon en madanm ki for e ki mon kontan ankouraz mon bann dimoun e mon bann kliyan e bann lezot madanm pour vini, vin zwenn mwan e donn koudmen pour travay. Annou montre bann zonm ki bann madanm osi i kapab fer sa louvraz,» Madanm Barbe i dir.

Parey dan tou louvraz, Madanm Barbe i admet ki i anann serten defi ki in rankontre me sa pa’n zanmen dekouraz li akoz i dir ki se lafason ki en dimoun i apros sa bann defi ki zwe en gran rol. Ansemoman i annan 5 travayer ki i responsab kot lofis Lotorite Por Sesel lo lasose Inter Island Quay.

«Mon ganny enpe bann difikilte, kekfwa ennler i annan bann kliyan ki pa dan son bon mood, me selman se lafason ou apros zot e koz avek zot. Mon fer sir ki mon donn zot en bon larepons ki ler zot sorti la dan por zot sorti avek en zoli sourir lo zot figir. Mon bann koleg travay i donn mwan bokou respe, akoz mwan mon respe zot e si ou annan respe pour lezot ou ganny bokou an retour. Lapros i enportan pour kapab fer sa,» MadanmBarbe i dir.

Sa lannen tenm ki Nasyon Ini in swazir pour Lazournen Enternasyonal bann Madanm ki ganny selebre le 8 Mars i ‘Bann madanm dirizan : En lavenir egal dan en lemonn avek viris Covid-19’. Madanm Barbe i dir ki menm si Covid-19 in annan en gran lenpakt lo bann aktivite komers dan por, i santi ki dan son landrwa travay e osi dan pei i annan egalite loportinite ant zonm ek fanm menm dan sa pandemi.

«I annan egalite, me sa i depan lo oumenm ou. Si ou pa bouze e ou dir sa louvraz i zis pour bann msye ou pa pou zanmen fer nanryen akoz napa keksoz ki zis pour msye. I pou depan lo ou kalifikasyon e ou kapabilite pour ou kapab fer sa louvraz. Tou keksoz ou bezwen eseye dan lavi, si ou eseye e ou kapab fer alors ou kapab make it,» Madanm Barbe i dir.

I azoute ki san sipor kontinyel sorti kot management Lotorite Por Sesel, i posib son semen pour ariv kot i ete ti kapab bokou pli difisil. Sekter maritim i enn sa bann sekter ki tradisyonnelman ganny apersevwar konman en sekter dominen par bann zonm. Me Madanm Barbe i dir ki se gras a son personalite tre for e plizyer lezot kalite ki i annan dan li ki’n fer li persevere.

«Si ou en dimoun ki disiplinen, si ou annan bon lapros avek ou kliyan e si ou en dimoun ki annan bokou konfidans dan ou lekor ou pou kapab fer sa louvraz…alors mon kontinyen demann Senyer Bondye pour kontinyen donn mwan sa lagras pour mwan kapab annan sa konfidans ek lafors pour mwan kontiny sa travay.»

Pier Master Priscilla Barbe i dir ki son karyer pa pou fini la akoz tan ki i ankor annan kouraz pour li travay i pou kontinyen servi bann loportinite ki ganny met a son dispozisyon. Dan son plan pour lavenir i pe target bann pozisyon ki pli o e dan pe fer sa i pe osi tras en larout pour bann lezot zenn fiy ek madanm swiv dan son lepa.

Alokazyon Lazournen Enternasyonal bann Madanm, Madanm Barbe i pas sa mesaz avek tou bann madanm Seselwa ki pe travay dir pour ede redres lekonomi sa pei.

«Mwan mon pe dir bann madanm take sa challenge, isi dan Lotorite Por i annan bokou devlopman. Si i annan bann madanm ki anvi vin join sa lorganizasyon alors mon welcome zot pour vini. Annou met lanmen ansanm e annou montre bann msye ki nou kapab fer parey zot e menm pli byen ki zot.»

Sa bann portre ki swiv i montre Madanm Barbe pandan ki i pe fer son travay.

En kontribisyon Minister Lapes ek Lekonomi Ble