Follow us on:

Facebook Twitter LinkedIn YouTube

Domestic

US i rezet kominike lapres par Lofis Prezidan e demande ki Spiker Lasanble Nasyonal i demisyonnen |26 February 2021

United Seychelles i fortman kondann reaksyon par Lofis Prezidan lo son konferans lapres ki i ti fer Merkredi le 24 Fevriye.

US i mentenir ki tou bann deklarasyon ki in fer i bann ki baze lo laverite e i konsider sa litani konplent par Lofis Prezidan konman en mannev pour esey tir latansyon dimoun lo realite deplorab dan pei e osi esey etablir labaz pour anpes United Seychelles eksprim libreman son lopinyon.

United Seychelles i oule fer sa bann lobzervasyon swivan:

1. United Seychelles i oule felisit Lofis Prezidan pour son desizyon pour pa pous okenn staf dan lofis Vis-Prezidan e ki bann staf dan sa lofis ki zot departman in fermen pou ganny ofer en lot plas travay. US pou swiv sa devlopman tre pros;

2. United Seychelles i mentenir ki dan ka sa endividi ki travay Minister Ledikasyon, son demann pour renouvle son kontra ti fer le 7 Desanm 2020 e ki i ti soumet son bann plan ek target le 28 Desanm. Kontrerman avek sa ki Minis pour Ledikasyon, Dr Justin Valentin, in dir Merkredi lo televizyon, sete selman apre konferans lapres United Seychelles ki sa Msye ti ganny apele par son direkter zeneral e enformen ki son kontra pe renouvle. Fodre note ki ziska aprezan sa Msye napa en kontra dan son lanmen;

3. United Seychelles i kategorikman rezet alegasyon fer par Lofis Prezidan ki son dirizan, Dr Patrick Herminie, ti kestyonn bidze SPDF. US i envit Prezidan pour reget sa konferans lapres akoz napa okenn moman ki lider parti US in koz lo bidze SPDF;

4. United Seychelles pa’n zanmen dir ki APDAR ki ti al diskit metadonn avek Moris, me plito ki akoz lenkonpetans gouvernman en avyon IDC ti bezwen vitman al sers metadonn Moris akoz metadonn sorti dan Lenn pa ti’n ariv atan;

5. United Seychelles i vwar li drol ki Lofis Prezidan pe reazir lo sa size manze Club Med. US i panse ki sa i montre ki degre anfanten sa ladministrasyon LDS i ete. US i annan lenformasyon konkret ki delegasyon Prezidan pa ti manz dan kantin akoz ler Prezidan ti mont Ste Anne dan 2 bato Gard Lakot kantin pa ti ankor ouver pour loperasyon;

6. United Seychelles i osi mentenir son pozisyon ki dan dernyen vizit ki Prezidan ti fer UAE le 19 Fevriye, i pa ti rankontre Crown Prince Abu Dhabi, Sheik Mohamed bin Zayed Al Nahyan a okenn moman;

7. United Seychelles i afirmen ki lentansyon pour retir bann lalwa konsernan bann byen (asset) politisyen ti fer par Prezidan limenm dan son diskour SONA;

8. United Seychelles i swete ki dan 14 zour pou nepli annan okenn ka Kovid dan Sesel akoz dapre Lofis Prezidan 70,000 dimoun pou’n fini ganny vaksinen. US i krwar ki sa pa realistik prenan kont ki la plipar dimoun pou ganny zot dezyenm doz Covishield ver lafen Mars;

9. United Seychelles i osi oule mentenir son pozisyon ki 2 Sekreter Deta, Dr Patrick Herminie e Anbasader Barry Faure ti kategorikman ganny enformen par zot minis respektiv ki sa pos ti pou ganny abolir. Dr Patrick Herminie ti deside demisyonnen e Anbasader Barry Faure ti negosye kondisyon son depar;

10. United Seychelles i osi mentenir son pozisyon ki Mer Lavil ti’n ganny promet plas Sekreter Deta. Sete limenm, Msye David André, ki ti fer sa deklarasyon dan en ‘interview’ avek Marietta Payet-Labrosse le 11 Fevriye dan Nouvel 8er.

United Seychelles i sirtou deplor menas fer par Lofis Prezidan pour anpes SBC kouver son bann konferans lapres e i oule fer rapel ki larzan ‘tax payers’ ki zot koz lo la i enkli larzan sa plis ki 28,000 siporter US.

US i oule fer rapel gouvernman ki SBC i en lenstitisyon endepandan e i pa sipoze pran direktiv avek gouvernman.

United Seychelles pou toultan fer son mye pour met laverite deor akoz i realize ki LDS in vin opouvwar par bat latet Seselwa e i kler ki zot lentansyon se kontinyen bat latet Seselwa pour reste opouvwar.

United Seychelles i oule sezi sa loportinite pour kondann sa let ekrir par Spiker Lasanble Nasyonal, Msye Roger Mancienne, dan son kapasite konman dirizan LDS pour demann SBC pour aret kouver konferans lapres US. US i panse ki si LDS i annan problenm avek son bann konferans lapres, LDS i annan tou drwa pour li osi fer parey, olye mannevre pour anpes en lot parti politik fer sa ki pour li.

US i akey okenn lenvestigasyon par SBC parey LDS in demande.

Baze lo lefe ki Msye Roger Mancienne konman Spiker Lasanble Nasyonal in pran en pozisyon partizan lo son konferans lapres, US i santi ki Msye Mancienne in konpromi son lenparsyalite e lendepandans konman Spiker. Fodre note ki Spiker i osi ganny konsilte lo lapwentman sef egzekitif SBC. Alors United Seychelles i demande ki Msye Roger Mancienne i demisyonnen imedyatman konman Spiker Lasanble Nasyonal.

US i oule averti gouvernman LDS ki okenn lesey pour anpes li eksprim libreman son lopinyon lo bann size ki afekte pei pou ganny son larepons apropriye.

 

Kominike lapres sorti kot United Seychelles

 

Not Editer:

Zournal Seychelles NATION i oule fer remarke ki bann deklarasyon prononse e bann pwennvi eksprimen dan sa kominike i pour United Seychelles.

 

 

More news