3 zofisye lapolis i ganny detenir pour vol |12 January 2021

Lapolis in raporte ki zot pe detenir 3 zot zofisye swivan rapor ki zot in enplike dan 2 diferan lensidan vol Hangard, Anse Etoile lo granmaten Dimans le 10 Zanvye. Enn sa lensidan in ariv kot en stor e lot kot en lakaz anba konstriksyon pa lwen avek kanmarad.

Formalite neseser pe ganny fer pour sispann sa 3 polisye antretan ki CID i fer lanket dan sa 2 ka.

Ladministrasyon lapolis i dir ki en tel aksyon i entolerab, malere e sagrinan prenan kont sa kantite zefor ek langazman ki mazorite son zofisye pe mete pour mentenir lord, lape ek sekirite dan pei pandan sa moman lensertitid.

I demoralizan pour aprann en nouvel parey me direksyon lapolis pe demann tou son bann lezot manm lafors pour pa les sa dekouraz zot e pour reste angaze pour kontinyen fer sa ki byen pour lafors ek kominote.

Sa 3 sispe pe pas ankour ozordi Mardi.

Kominike Lapolis