Doker i ‘anmar bato’ ziska ki zot zwenn ‘management’ lo zot kondisyon travay |05 January 2021
Le de reprezantan doker – Msye Azemia (a gos) ek Msye Porrice (Portre: Louis Toussaint)
En group doker ki travay avek lakonpannyen Hunt Detel Co Ltd i dir ki zot pou kontinyen pa al travay ziska ler zot zwenn bann ki ansarz sa lakonpannyen pour diskit lo zot kondisyon travay ki pa pe amelyore e zot pa dakor avek.
Sa ti ganny fer resorti apre ki en reprezantan sa bann doker, Randy Azemia, ek enn son lot koleg reprezantan, Hensel Porrice, ti zwenn avek manager ansarz bann doker kot Hunt Detel, Ronny Matatiken, lo sa size.
Sa miting byen kourt ti deroul yer bomaten kot ‘Fleet Logistic Centre’, en parti sa lakonpannyen baze Ile Du Port.
Sa bann doker ti son lavey refize pour travay an vi kondisyon travay ki zot dir pa bon akoz zot ti pe fer louvraz pour zonm anplis e zot pa ti pe ganny peye.
Zot ti osi mekontan avek bonous ki zot in gannyen e zot santi ki sa lakonpannyen pa pe partaz bann benefis ki i fer avek zot.
Fodre fer remarke ki ti napa prezans lezot bann doker dan zanmerant ler sa de reprezantan ti al fer sa pti miting.
“Nou pou kontinyen pa al travay ziska ki nou ganny en konversasyon avek bann ki pran desizyon dan sa lakonpannyen,” Msye Azemia ti dir an notan ki zot in ganny en antretyen zis avek Msye Matatiken ki’n dir zot ki sa bann dimoun ki pran desizyon zot dan vakans e avek restriksyon kont viris ‘corona’, zot pe osi travay dan lakour e i pa posib pour rankontre zot.
Dapre Msye Matatiken, sa lakonpannyen ti sipoze fer sorti zot pwennvi dan en kominike lapres me ziska tar yer apremidi, apre plizyer lesey, i pa’n posib pour ganny nanryen lo sa size sorti kot zot.
Patrick Joubert