Dezyenm pli vye madanm Anse Royale i selebre 105-an |21 December 2020
Madanm Anette zour son 105enm lanniversers yer
Menm si son lasante i tre frazil e i pa marse ni vwar kler, Madanm Wilhelmine Anette in reisi viv ankor en lot lannen e yer, le 20 Desanm, i ti selebre son 105enm lanniverser e sa i fer li 2enm madanm ki annan plis ki 100-an dan distrik Anse Royale apre Madanm Alda Philo ki ti selebre son 105enm lanniverser le 14 Zilyet osi sa lannen.
Pour mark sa gran moman dan son lavi ankor en fwa kire laparwas, Per Colin Underwood, ti al donn en benediksyon spesyal Madanm Anette kot i reste anler Mont Plaisir avek son fiy Christianne Marcel.
Prezan pour sa seremoni ti bann zanfan, pti zanfan e aryer pti zanfan Madanm Anette osi byen ki MNA distrik Anse Royale Sylvanne Lemiel, parmi lezot dimoun ankor.
En group zanfan ki dan lakoral legliz St Joseph Anse Royale ti’n osi vini pour sant karol e egey Madanm Anette.
Pour sa lokazyon Madanm Anette in ganny plizyer pannyen kado, lezot kado e osi fler sorti kot diferan lorganizasyon ek bann veteran dan distrik.
Son fiy, Madanm Marcel, i dir i tre kontan ki son manman in arive viv ankor en lot lannen pour ariv sa laz.
“Menm si mon vwar li in desann en bon pe selman apard lefe ki i pa vwar kler e i pa marse, i pa malad me i zis bezwen bokou swen ek latansyon e mon bezwen fer tou keksoz pour li,” Madanm Marcel i dir.
Madanm Marcel i dir son manman i ankor kontan son dite, dizef mole e lezot pti keksoz ki i prepare pour li dan bomaten e san bliy son bannann Sen Zak zonn byen bwi.
Nou swet Madanm Marcel bokou kouraz ek lasante pour li kapab kontinyen donn sa bon swen son manman.
Marie-Anne Lepathy
