Dan Lasanble Nasyonal sa semenn |04 December 2020
Byento en proze lakaz pour bann zenn profesyonnel Praslin ek La Digue
Bann zenn profesyonnel ek etidyan ki’n fini zot letid aletranze (returning graduates) ki sorti Praslin ek La Digue pou alavenir kapab benefisye avek lozman atraver en proze lakaz ki Minister pour Later ek Lakaz pe anvizaze devlope lo Praslin.
Minis pour Later ek Lakaz, Billy Rangasamy, in dir dan Lasanble Nasyonal sa semenn ki ziska aprezan demann pour lakaz par sa group dimoun sorti lo bann zil pros pa’n signifikan e bann aplikan in ganny asiste atraver bann diferan proze lo Mahé.
Me i dir ki son minister in rezerv en morso later anviron 9 mil met kare ki pou tire dan en kare later ‒ PR 6727 ‒ e ki annan potansyel pour en tel proze lakaz lo Praslin e ki pou osi benefisye bann aplikan sorti lo La Digue.
Minis Rangasamy i dir ki pour lemoman konsep sa devlopman pa ankor finalize. I dir lenplimantasyon en tel proze pou baze lo demann e osi finansman ki son minister i kapab gannyen e la in demann sipor bann manm Lasanble Nasyonal letan bidze pour lakaz i vin devan zot.
Minis Rangasamy ti donn sa bann detay letan i ti pe reponn en kestyon lo sa kalite progranm lakaz pour aplikan sa de zil demande par manm elekte pour Baie Ste Anne Praslin, Churchill Gill.
Dan sa menm sesyon demann kestyon Mardi, Minis Rangasamy ti osi reponn en kestyon par manm elekte pour Mon Buxton Gervais Henrie lo devlopman proze lakaz Lari Hangard. Minis Rangasamy i dir i annan plan pour konstrir 8 younit lakaz 2 lasanm e 8 younit lakaz 3 lasanm lo en morso later ki mezir anviron 1850 met kare dan sa landrwa me in fer resorti ki sa proze pe rankontre serten konpleksite e retar. Sa i dir i akoz semen egzistan i tro etrwat e demars pour agrandi li i enkli pas lo later prive e negosyasyon avek bann propriyeter konsernen in deza konmanse e pe kontinyen, i annan en propriyeter ki bezwen ganny relocate e i osi annan nesesite pour konstrir en pon lo Larivyer Moosa.
Me Minis Rangasamy in dir ki sa proze i enn ki parmi priyorite son minister e i ekspekte demare osito ki tou sa bann konpleksite i fini regle e finansman i finalize.
Lo son kote, Msye Henrie ti fer resorti ki i pa ti okouran negosyasyon avek bann proprieter later e i pa’n enplike dan okenn negosyasyon me i dir i pare pour ede dan sa bann demars.
Ti osi annan lezot kestyon lo devlopman en lot proze lakaz Mont Signal.
Minis Rangasamy ti osi ganny demande par Msye Henrie pour donn en kontrandi Lasanble Nasyonal lo finalite bann demars avek parti United Seychelles pour retourn plizyer morso later avek leta parey ansyen administrasyon ti’n deza anonse.
Lo sa size Minis Rangasamy ti demann lasanble enpe plis letan pour fer en legzersis konpreansiv lo sa size avan i kapab vin prezant lasanble avek bann lenformasyon e detay ki korek. I ti fer resorti ki i deza annan serten lenformasyon me i prefere etidye sa size pli oprofon vi ki i ekspekte ganny en rapor ki oditer zeneral in fer lo la.
Parmi lezot kestyon ki Minis Rangasamy ti reponn ti annan pour fer avek proze land bank Fond Azor Praslin, problenm drenaz Pointe Larue, sistenm pwen later ek lakaz, parmi lezot.
Marie-Anne Lepathy