Lapolis pe demann plis prekosyon lo semen |27 November 2020
Lapolis in raporte ki en fiy aze 19-an ki pe reste La Misère e ki ti enplike dan en aksidan Dimans apremidi dan distrik Anse Boileau, i admit dan younit swen entansif kot Lopital Sesel avek dimal entern, me son kondisyon in kantmenm ganny dekri konman stab.
En garson aze 24-an, drayver loto ki sa fiy ti pasaze ladan, li in ganny large Merkredi apremidi apre pros 4 zour pase lo ward Lopital Sesel.
En lot pasaze zonm dan menm loto li i ti ganny sans sove dan aksidan san gran dimal.
Sa fiy ki ti’n orizinalman admit dan younit swen entansif Dimans menm, ti ganny transfer lo ward Lendi apremidi avan reganny transfer dan younit swen entansif Mardi apremidi swivan serten entervansyon sirizirkal.
Sa aksidan ti ariv zis avan ariv kot laboutik lafanmiy Fock Yune apre ki drayver ti perdi kontrol son transpor e tap dan en miray. Sa letan sa loto ti sorti direksyon Anse à la Mouche annalan ver Barbarons. Lapolis pe fer lanket dan sa ka.
Osi dimans, Pti Barbarons en zonm ek 2 zanfan ti sanse pour pa ganny gran dimal dan en aksidan kot en Jeep Vezel ki zot ti ladan ti preski konpletman andomaze. Sa 3 dimoun ti ganny latansyon medikal neseser klinik Anse Boileau ek Lopital Sesel apre ganny large.
E swivan lensidan kot 2 dimoun ti ganny tape par transpor yer dan 2 lensidan separe kot parmi en pti garson 8-an in kas en kote lipye, lapolis pe ankor enn fwa demann motoris konman pyeton pour egzers plis responsabilite e pran bokou plis prekosyon letan zot pe servi larout piblik.
Kominike sorti kot lapolis