Lapolis i averti kont bann rasanbleman ek lezot aktivite ilegal |19 September 2020
Lapolis pe averti dirizan bann parti politik avek zot siporter kont rasanbleman ek motorcade san permisyon ek kondisyon sorti kot lapolis ek departman lasante.
Manm piblik ek siporter bann parti politik pe egalman ganny averti kont sa bann lofans ek aksyon ilegal swivan:
- Konsonmasyon lalkol dan transpor, lo semen e dan landrwa piblik
- Dray anba lenfliyans lalkol oubyen sibstans
- Dray dan fason danzere, parey fer vites
- Anmenn pasaze parlao ki zot laysenns i permet zot
- Les pasaze debout e asiz lo bor pick-up ek laport loto
- Park zot veikil dan en fason ki koz blokaz lo mouvman trafik ek pyeton
- Koz lannwi par egzanp tapaz oubyen son anplifye
- Provokasyon ek lensilt anver lezot
Piblik an zeneral pe osi ganny averti ki dan sirkonstans kot lapolis pa arive fer larestasyon sirplas, bann aksyon ilegal ek lofans ki ganny konmet pou ganny dokimante e sa bann ka pou ganny anrezistre e anvoy biro prokirer zeneral pour prosekisyon devan lakour.
Lapolis pou servi tou resours apropriye a son dispozisyon tel ki kod penal, lalwa trafik osi byen ki bann regilasyon departman lasante kont Covid-19 pour asire ki bann aktivite organize i an konformite avek lalwa.
Kominike Lapolis