En zonm i sov en pti fiy dan en lakaz ki ti pe pran dife |18 August 2020
Dega okazyonnen par sa dife (Portre: Jude Morel)
En zonm ti eroikman sov en pti fiy 8-an ki ti’n pri dan lasanm en lakaz ki ti pe pran dife Petit Paris yer bomaten.
Sa pti fiy ti li tousel ler dife ti pran dan sa lakaz kat lasanm ki ti abrit 4 adilt ek 2 zanfan.
Cliff Mathiot, ki osi en zabitan Petit Paris, ti kot sa lakaz ler sa dife ti konmanse. I ti dir ki i ti’n vin la kot son met lakaz me i pa ti la e apenn 5 minit i ti tann en kriye manrmay anndan detrwa fwa kot apre en lot dimoun, ki ti la pe aranz loto dan garaz kot sa lakour, ti al gete.
“En pti moman plitar, mon vwar li vin lo mwan e dir mwan ki i pa kapab antre anndan akoz i annan dife. Deswit mon ti rantre anndan par en laport ki ti ouver, pas dan salon kot dife ti’n deza konmans pran, al drwat dan lasanm, pran sa pti fiy e met li anba mon triko pour protez li e anmenn li deor,” Msye Mathiot, ki en ansyan manm lafors defans, ti dir.
I ti azoute ki i remersye Bondye pour donn li sa kouraz pour sov en lavi akoz dife ti vin pli entans zis konman i ti’n fini retir sa pti fiy.
Sa pti fiy ti ganny transporte lopital pour lobzervasyon e plitar ganny large.
Dapre portparol Lazans Servis Tenny Dife ek Sovtaz, Jones Madeleine, zot ki ganny en kou-d-telefonn ver 11er ekek kot la zot ti deplway trwa masin. I dir ki ti pran zot senk minit anviron pour ariv kot sa lakaz ki ti konpletman anflanm. I ti pran zot anviron 1erdtan edmi pour met sa dife anba kontrol en tenny li.
En lanket in ouver pour etabli kwa ki’n kapab koz sa dife.
Vi ki ti annan en pe mirmirasyon par en gran lafoul prezan ler zot pli gro masin ki anmenn zis leskalye ti premye pour ariv kot dife, Msye Madeleine ti dir ki sa kanmiyon ti lo en sesyon lantrennman routin ki ganny fer tou le Lendi e vi ki zot ti’n vwar lafimen ler zot ti dan sa zanmerant, konman zofisye zot ti diriz ver landrwa konman parti zot responsabilite.
I ti remersye Msye Mathiot pour son zes brav ki i ti’n fer pour sov sa pti fiy ki ti’n pri dan lasanm.
Msye Madeleine ti osi tre konsernen avek lakantite dimoun prezan, ki i ti dir i fer zot travay enpe difisil.
Dapre ladministrater distrik, Lilianne Biong, departman gouvernman lokal in fer leneseser pour plas sa kat adilt ek sa de zanfan dan en landrwa tanporer.
Patrick Joubert