Follow us on:

Facebook Twitter LinkedIn YouTube

Domestic

Mesaz Minis pour Zafer Lafanmir pour komemor lazournen nasyonal bann sitwayen ki annan serten dezabilite |13 July 2020

Mesaz Minis pour Zafer Lafanmir pour komemor lazournen nasyonal bann sitwayen ki annan serten dezabilite

Minis pour Zafer Lafanmir, Madanm Mitcy Larue

«Kontinyen gard sa rezilyans, lazwa de viv e lespwar parey labitid pour sirmont bann defi»

 

«Le 12 Zilyet i sa zour ki Sesel i dedye pour selebre nou bann sitwayen – zanfan, zenn e adilt – ki annan serten dezabilite. Pour nou i en lazournen kot nou mazin zot tou e kot gouvernman i promouvar tou bann aki, developman e sikse ki sa group spesyal i reprezante pour nou.

«Sa lazournen ki ansanm avek lasosiasyon bann dimoun ki pe viv avek desabilite e tou bann lezot akter, nou zwenn pour sansibilz la popilasyon lo nesesite pour adopte en model pli enkliziv kot i konsern dimoun avek dezabilite an prenan kont ki zot annan menm drwa ki nou tou.

«O milye pandemik COVID-19 ki’n sanz nou sitiasyon ekonomik e sosyal e pe enpakte lo nou lavi, e bann aktivite ki nou ti a kontan fer, i pli enportan ki zanmen ki nou tou nou vin ankor pli pre ansanm an solidarite, pour fer sir ki nou donn lespwar sa enn ki son sitiasyon in sanz dan en fason drastik.

«Tou akter, tel ki lasosiasyon dimoun avek dezabilite e dimoun dan lakominote i bezwen zwenn avek gouvernman pour nou kontinyen anmenn sipor pour bann paran ki annan zanfan avek dezabilite e osi bann adilt ki plis ki zanmen pe vwar zot ganny touse avek sitiasyon ekonomik.

«Alors mon mesaz pour zot ozordi, se ki i annan en nouvo normal ki nou bezwen nou tou adapte avek. Nou pou bezwen anmenn bokou sanzman dan fason fer keksoz, tel ki dan nou konportman e fason ki nou fer bann depans lakour. Annou pran bon desizyon dan tou sa ki nou fer, e toultan gard antet ki i kapab annan lezot dimoun ki pe pas dan plis difikilte ki nou. Kontinyen gard sa rezilyans e lazwa de viv ki mon konnen zot annan e gard sa lespwar parey labitid pour sirmont bann defi.

«Mon lans lapel avek tou dimoun otour zot dan zot lakour pour kontinyen donn zot sa latansyon ek lanmour e egey zot menm si i annan difikilte lavi.

«E sa i rekonfort mwan avek lespwar, lespwar fortman dan rezilyans nou bann dimoun ki viv avek dezabilite.

«Mon oule osi ankouraz tou bann ki pe fer bokou pour realiz rev nou bann dimoun avek dezabilite e asire ki zot zouir zot drwa dapre Konvansyon Bann Dimoun Avek Dezabilite.

«Nou konnen bann baryer ki ekziste, me pti a pti gouvernman i donn son langazman pour kontinyen adres bann defi pour tir sa bann baryer. I pou pran letan, me avek sa komitman politik, ansanm nou pou arive.

«Pour bann dimoun, paran oubyen carer ki okip nou bann zanfan oubyen adilt avek en dezabilite, donn zot sa bon swen ek lanmour e respekte zot drwa pour kapab zouir en lavi an bonn sante e ki anmenn lazwa dan zot leker. Annou touzour mazinen ki nou ti a kontan bon tretman si nou osi nou ti dan en sitiasyon parey. Alor si i annan ki pe negliz zot dimoun avek dezabilite e ki pe abiz zot, mon enplor zot pour pran konsyans e revwar zot fason fer.

«Pour tou bann aksyonner dan domenn dezabilite, mon pran sa lokazyon pour dir zot mersi pour tou zot zefor. Bokou zot pe travay lo en baz volonter e san zot, nou pa ti pou kot nou ete la ozordi.

«A sa pwen mon ti a voudre ki nou tou nou redouble nou zefor kot nou tou ansanm nou travay avek en menm vizyon.

«Pour manm piblik an zeneral zot osi zot annan en rol enportan pour zwe, pour vreman promouwar drwa bann dimoun avek dezabilite, e pour denons okenn form labi anver bann dimoun avek dezabilite.

«Pour tou nou zanfan, zenn e adilt ki pe viv avek dezabilite mon swet zot en bon lazournen, e i mon swe ki zot tou ki kapab, zot vreman fer sa pa pozitiv avek led zot fanmir pour devlop zot vre potansyel pour en meyer lavenir.

«Mersi.»

 

Kominike lapres sorti kot Minister Zafer Lafanmir

 

 

 

 

More news