Lasanble i rezet mosyon ki demann gouvernman pour reentrodwi laboutik franchise |09 July 2020
En mosyon ki ti pe demann gouvernman pour reentrodwi bann laboutik franchise rezyonal avek bi ed bokou fanmir avek reveni pli feb pour ganny akse avek komodite esansyel a en pri konparab parey anvil, in ganny rezete par Lasanble Nasyonal
Sa ti vin apre ki selman 12 manm ki ti vot anfaver e 15 ti vot kont pour rezet sa mosyon table par manm elekte pour Takamaka, Onorab Paul Ernesta.
Mosyon orizinal Onorab Ernesta ti konm swivan :
«Anvi ki nou lekonomi pe eksperyans lefe negativ COVID-19 kot pri komodite pe ogmante, e koman konsekans bokou dimoun pe ganny afekte, dan sa konteks, mon demann Lasanble pour fer en demann avek gouvernman pour travay avek STC, oubyen, kolabor avek sekter prive pour konsider etablir franchise ouswa retail outlet dan bann rezyon ki napa, parey rezyon sid. Sa ava ed bokou fanmir pour ganny akse avek komodite esansyel a en pri konparab parey anvil.»
Bann manm lo toulede kote ki ti entervenir lo sa mosyon ti fer resorti ki lentansyon e lide sa mosyon i bon akoz sa onorab ki sorti dan distrik pli lwen avek lavil i anvi anmenn en servis esansyel pli pre avek zabitan son distrik.
Lo kote parti minoriter (United Seychelles – US) bann manm ti fer resorti bann difikilte ki zabitan sirtou bann dan sid ek was i depans bokou pour ariv anvil pour vin fer zot konmisyon e bann franchise rezyonal ti pou anmenn bokou soulazman pour zot.
Me bann manm parti mazoriter (Linyon Demokratik Seselwa – LDS) ti fer resorti ki franchise pa pou anmenn vre solisyon pour soulaz problenm pri lavi me sa ki neseser se travay avek lasosyasyon bann marsan, STC e lezot pour rod fason pli efikas pour benefis tou dimoun san met en lot fardo lo gouvernman. Pour bann dimoun vilnerab ki annan en kart Lazans Proteksyon Sosyal pour fer konmisyon kot STC, bann manm LDS in propoze ki mekanizm neseser i ganny met anplas pour permet zot servi sa kart dan nenport magazen ki vann komodite esansyel pour fer ki zot pa ava bezwen desann kot hypermarket STC selman pour zot kapab fer zot konmisyon.
Marie-Anne lepathy