En zonm i mor apre en aksidan dan por Zedi apremidi |20 June 2020

Lapolis in raporte ki zot pe fer lanket dan en lensidan kot Tony Dodin, en zonm 48-an sorti Grand Anse Mahé, ti perdi en kote son lebra an rezilta en aksidan lo Nouvo Por Zedi apremidi e mor yer bomaten dan younit swen entansif (ICU) kot Lopital Sesel.

Rapor sa lensidan ti ganny raporte avek lapolis ver 5er20 Zedi apremidi e lanmor sa viktim ti ganny fer par lotorite lasante ver 6er35 yer bomaten.

Sa ki lapolis in aprann i, dan pe fer aryer, en ‘stacker’, sa bann gro masin ki lev ‘container’ ti fer kolizyon avek en ‘forklift’ ki Dodin ti operater lo la.

An rezilta sa kolizyon, domaz lo lebra kote gos Dodin ti nesesit entervansyon sirizikal me malerezman i ti mor yer bomaten kot i ti’n admit dan ICU.

Operater sa ‘stacker’ ki ti ganny arete, detenir e ganny anmenn ankour yer an relasyon avek sa lensidan lo por Zedi apremidi kot Msye Dodin ti evantyelman mor yer bomaten, in ganny large antretan ki lapolis i kontiny zot lanket.

Kominike lapolis