Mesaz Minis pour Lanplwa, Imigrasyon ek Leta Sivil, Myriam Telemaque, alokazyon Lafet Travayer 2020 |30 April 2020
Minis Telemaque
‘Annou montre plis rekonnesans anver nou travay’
Minis pour Lanplwa, Imigrasyon ek Leta Sivil, Myriam Telemaque, in demann tou travayer pour mazin lo nou rol konman en travayer e pour montre plis rekonnesans anver nou travay pandan sa moman kot Sesel e larestan pei dan lemonn pe pas atraver bann moman difisil fas a sa pandemik COVID-19.
Sa i vin dan en mesaz ki Minis Telemaque in anvoye alokazyon Lafet Travayer demen le 1er Me.
Mesaz Minis Telemaque i lir koumsa :
«Alokazyon Lafet Travayer, mon oule remersye tou travayer pour zot travay dir e zefor ki zot donnen dan zot travay.
«Sesel i zwenn lemonn antye pour montre solidarite avek tou travayer. Bokou travayer sa lannen pou selebre Lafet Travayer dan zot lakour, an rezilta bann restriksyon lasante anfas pandemik COVID-19. Sa i bann mezir ki nou bezwen swiv pour asire ki nou lafors travayer i reste sen e sof.
«Mon alor remersye tou travayer dan servis kritik ek servis esansyel pour zot travay ki pe ede protez nou pei. Mon remersye bann ki pe travay dir pour anpes sa viris propaze e pour sov lavi sa ki’n ganny enfekte. Annou pran sa letan pour mazin nou rol konman en travayer e annou montre plis rekonnesans anver nou travay. Annou kontinyen donn nou sipor e travay ansanm pour nou al anver en fitir avek lespwar malgre defi COVID-19.
«Lenpak viris korona i loportinite pour anplwayer amelyor serten kondisyon e ofer kondisyon travay ki pli inovativ. Nou pou bezwen fer serten sakrifis me Sesel i kont lo tou son bann travayer pour sakenn fer son kontribisyon.
«Bonn fet tou travayer.»
Sours : Minister Lanplwa, Imigrasyon ek Leta Sivil