Follow us on:

Facebook Twitter LinkedIn YouTube

Domestic

Artis Seselwa i senm lanmour, lespwar ek lapresiasyon pandan pandemik COVID-19 |27 April 2020

Pandemik COVID-19 in anmenn bokou sanzman dan lavi toulezour pour plizyer milyon dimoun atraver lemonn. Dan en zefor pour anpes propagasyon sa viris, laplipar gouvernman in enpoz bann restriksyon lo mouvman osi byen ki vwayaz, e bann lord pour dimoun reste kot lakour in vin en normalite.

Isi Sesel, bann mezir ek restriksyon pa’n osi sever parey serten lezot pei dan lemonn, me kantmenm, bokou in bezwen reaziste pour fer fas a bann sanzman okazyonnen par sa pandemik.

Pandan ki bokou i anfermen dan lakour, santer ek artis renonmen atraver lemonn, osi byen ki en nonm artis Seselwa, pe osi sezi sa loportinite pour fer pase zot mesaz e osi kit zot bann fans angaze pandan sa moman kot responsabilite endividyel e kolektiv pe ganny ranforsi, dan kad zefor pour anpes propagasyon sa viris e pour elimin li.

Lapriyer en zanfan par Tyra Telemaque i enn sa bann sanson ki’n ganny rikorde avek lobzektif ankouraz pep Seselwa pour reste se zot pandan ki restriksyon lo mouvman i anplas pour anpes propagasyon sa viris, me pour osi annan lespwar ki ansanm, Sesel pou sirmont sa lobstak e sorti viktorye.

Tyra, ki zanfan santez Mia avek son msye mizisyen e prodikter Eddy Telemaque, pa nouvo lo lasenn lanmizik lokal e a plizyer repriz in aparet lo lekran pour demontre son talan e pasyon pour lanmizik. Sa zenn talan, ki aze selman 10-an, in partisip dan de edisyon Twinkle Twinkle Little Star e in osi rikord en sanson titre ‘Ekout Lavwa bann zanfan’ ansanm avek son manman Mia e ki ti aparet lo son premye albonm ‘Prezan’. Pli resaman, Tyra in kolabor avek Jahkim pour sanson ‘Zis Kreater’, en sanson ki pe fer bokou sikse e ki lo albonm Jahkim ‘Dil I Real’ (D.I.R).

Sa sanson, enterprete selman par Tyra, in ekrir par son papa Eddy Telemaque avek bi fer resorti santiman bann zanfan pandan sa moman difisil kot zot routin labitid in totalman enteronpe e kot i annan bokou lensertitid ek lenkyetid.

«Mon’n tann detrwa artis in fer en morso lo sa pandemik e alor mon’n vwar i osi enportan ki lavwa bann zanfan i ganny tande, vi ki zot osi zot pa’n ganny eparnye e zot in osi ganny afekte. Tyra li menm i dir i mank lekol, i mank so bann zanmi osi, e se sa ki’n lide e lenspirasyon deryer ‘Lapriyer en Zanfan’» Eddy i dir.

Tyra in preski grandi dan studio akote son papa e i deza konpran bokou dan prodiksyon lanmizik. Apard sanz enn de parol dan sa morso, Tyra in zwe en rol aktiv dan prodiksyon sa morso e ti fer byen kler ki i anvi en stil lorkes, avek son vyolon ek perkisyon.

«Konman mon’n donn li parol, in fini master sa e dan lespas 1 a 2-erd-tan nou ti’n fini rikorde. Nou pa ti pe ekspekte ki i pou ganny byen resevwar koumsa, lo sa splander me bokou dimoun lo medya sosyal pe montre zot lapresiasyon e dir ki sa sanson i tousan e envok lemosyon .»

Parmi bann pwen for sa morso i lapresiasyon pour lavi, lasante e tou bann mervey ki Bondye i beni Sesel e lemonn antye avek e en mesaz pour reste for e annan lafwa ek lespwar ki tou keksoz pou byen pase.

An plis, Tyra i note ki sa viris pe anmenn destriksyon e remersye Bondye pour bann profesyonnel ki pe sakrifye zot lavi pour ede sov lavi.

Anmenmtan, i remarke ki sa sitiasyon pe osi fer dimoun apresye bann keksoz ki zot ti pe neglize oparavan tel ki lasante, fanmiy ek lezot.

Menm si i kontan lanmizik e sante, Eddy i dir ki Tyra pe plito konsantre lo son letid pour le moman, ziska ki i pli gran.

‘Lapriyer en Zanfan’ i son premye sanson solo e petet dernyen pour enpe letan me kantmenm, bokou pe apresye nivo talan sa zenn artis e son mesaz enportan pandan sa moman difisil.

 

Laura Pillay

 

 

 

Tyra ek son paran an aksyon

More news