Follow us on:

Facebook Twitter LinkedIn YouTube

Domestic

Lalit kont COVID-19 - Lapolis pou vin pli sever kont bann ki pa respekte lalwa anplas |17 April 2020

Lalit kont COVID-19 - Lapolis pou vin pli sever kont bann ki pa respekte lalwa anplas

Asistan Sirentandan Denousse (a gos) ek Toussaint pandan rankont avek lapres yer (Portre: Louis Toussaint)

Lapolis in averti ki zot pou vin pli sever anver manm piblik ki pa respekte bann regleman ek lavertisman ki’n ganny met anplas par departman lotorite piblik an relasyon avek viris korona (COVID-19) la ki nouvo regleman lo mouvman ek deplasman dimoun i vin anfors ozordi.

Se zofisye ansarz seksyon trafik dan lapolis, asistan sirentandan Antoine Denousse ki ti dir sa yer apremidi pandan en rankont avek lapres kot kordgard santral lo loperasyon lapolis relye avek viris korona (COVID-19). Osi prezan ti portparol lapolis, asistan sirentandan Jean Toussaint.

Vi ki zis bann travayer dan bann departman klasifye konman kritik ki pou ganny drwa sirkile lo semen aparti 7er diswar tanto ziska 6er bomaten demen, Msye Denousse ti dir ki nenport dimoun ki pa sipoze lo semen, apye oubyen dan transpor, pou ganny arete e prosekite pour kas lalwa ki’n ganny met anplas.

I ti dir ki dimoun in ganny ase lenformasyon e zot konpran tre byen kwa ki pe ganny fer e kwa ki zot devret pe fer pour anpes viris korona propaze.

I ti dir ki moman in arive pour lapolis aret donn ‘warning’ me pour pran aksyon kont bann ki dezobeir lalwa.

Msye Denousse ti donn legzanp kot bann dimoun ki profite pour servi transpor ki napa patant, drayver ki napa laysenns, transpor ki annan tro bokou dimoun ladan tel ki dan bis SPTC ki Ia aprezan zot pou konmans sarz bann drayver ki pran pasaze anplis ki pa permet, parmi lezot krim ki pou ganny komet par lezot dimoun.

I enplor bann ki napa nanryen pour fer anvil oubyen lo semen dan bann distrik pour reste se zot parey lalwa relye avek COVID-19 i demande, pour ede elimin sa viris.

Lo son kote, Msye Toussaint ti dir ki depi ki bann dernyen regilasyon konsernan COVID-19 ti vin anfor 10 zour pase, tou bann zofisye lapolis zot ‘on duty’. Depi sa letan zot in anrezistre 84 ka kot dimoun in kas lalwa an relasyon avek viris korona. I ti dir ki sa bann ka ti annan pour fer avek mouvman ek groupman dimoun ki pa ti neseser, parmi bann lezot lofans relye avek COVID-19.

I ti fer resorti ki sa bann ka pe ganny met ankour kot serten ka in deza konmans pase tel ki latak lo zofisye lapolis, reziste larestasyon e menm ‘bribery’ kot serten marsan ti’n esey donn larzan bann zofisye lapolis pour les zot reste ouver apre ler kan zot ti sipoze fermen.

I ti eksplike ki apard met anmars zot plan loperasyon an relasyon avek COVID-19, lapolis pe osi kontinyen ek son loperasyon normal lo nivo santral an relasyon avek lezot krim tel ki vol, kas batiman, kas transport, parmi lezot.

I ti dir ki dan sak rezyon lo Mahé, Praslin ek La Digue i annan en sant operasyonnel (Joint Operation Centre) kot zot dil zisteman avek bann loperasyon an relasyon avek COVID-19. Me i ti fer remarke ki sant komann anvil i an kontak avek sa bann sant operasyonnel rezyonal lo bann lezot rapor ek krim ki pas atraver sant komann kordgard santral.

Msye Toussaint ti dir ki lapolis, ansanm avek zot partener, bann manm lafors defans, apard ki fer patrol an relasyon avek COVID-19, pe osi fer bann baraz e fer bann tyek lizour konman aswar lo grannrout piblik ensi ki lo bann semen segonder lo Mahé, Praslin ek La Digue. I ti fer remarke ki anrelasyon avek bann lofans COVID-19, lapolis in met en task force spesyal ki konpri zofisye sorti dan seksyon CID ek zofisye dan seksyon trafik, ki ava ede akseler lanket dan bann ka ki pou pas ankour.

I ti osi fer remarke ki anvi bann regilasyon COVID-19 ki anplas lapolis in nobou kontenir nivo krim dan pei.

Msye Toussaint ti note ki lapolis pe zeneralman ganny bon korperasyon avek manm piblik e ki zot byen satisfe.

Zot swete ki avek nouvo regilasyon ki anfors aparti tanto, zot ekspekte vwar zis bann dimoun ki’n ganny otorize e sipoze pe travay, lo semen.

Toudmenm in demann mann piblik pour ede soulaz enpe louvraz bann polisye par obeir lord ki ganny donnen e pou osi montre enpe plis korperasyon, sirtou an sa ki konsern ‘social distancing’, ki ansanm i ava ede pour elimin sa viris dan nou pei.

I ti dir ki avek sipor bann lazans ki enplike direkteman dan lalit kont COVID-19, sa i a osi ede pour anpes gran kantite dimoun pour desann anvil, sirtou dan sa moman lafen dimwan ki pe aprose.

I’n osi lans en lapel avek manm piblik pour pran enpe plis prekosyon anver zot propriyete prive, sirtou loto, kot in annan plizer ki’n ganny kase, sirtou dan rezyon norwas ek sidwas Mahé, en sitiasyon ki in dekri konman enpe kritik.

 

Patrick Joubert

 

 

 

 

 

 

 

 

 

More news