En gran nonm dimoun ti anvil yer pour tous zot sekirite sosyal |16 April 2020
Malgre restriksyon lo mouvman en gran nonm dimoun ti’n desann anvil yer bomaten kot zot labank ek kot Lazans Proteksyon Sosyal ki baze Ocean Gate House, pour tous zot pansyon oubyen lezot benefis sosyal ki sa lazans i peye tou lemwan atraver pei.
Parmi sa gran group dimoun ki ti’n desann anvil ti en gran nonm dimoun aze. Laplipar ti dir ki zot ti’n vin sers zot pti larzan pour aste zot konmisyon vi ki zot pa konnen ki pou kapab arive la ki plis mezir kont propagasyon viris korona (COVID-19) in ganny entrodwir.
Sa gran group dimoun ti’n desann menm si sa lazans ti’n lans en lapel pour ki zot pa fer li si zot pa tro bezwen sa larzan pour lemoman, zis pour evite ki viris korona (COVID-19) i propaze ouswa zot menm zot zot ganny enfekte avek sa viris.
Sa lazans ti’n lans sa lapel anliny avek bann regleman ki’n ganny met anplas par lotorite lasante piblik.
Preski tou bann labank ti’n deborde avek dimoun kot ti annan bann laliny ki ti vreman long. Serten, avek led lapolis, zot ti a pe esey enplimant sa konsep ‘gard distans’ e dimoun ti antre enn alafwa depandan lo lakes ki ti vid.
I annan ki ti osi otoriz laliny anndan e lezot zis deor.
Kot Lazans Proteksyon Sosyal ti preski menm zafer kot bann dimoun ti antre enn par enn depandan lo lakes ki ti vid.
Labank Komersyal Sesel ek Labank Absa ti bann landrwa kot ti annan plis dimoun e kot sa konsep ‘gard distans’ pa ti pe ganny respekte o konmansman e kot plitar lapolis ti bezwen mele.
Vi ki lamazorite labank ti pe fermen 11er bomaten dapre zot nouvo regleman, sa in kapab ede pour fer dimoun prese pour al tir zot larzan dan sa pti peryod letan.
Dan en kominike, Labank Komersyal Sesel i dir ki anliny avek lanons Lotorite Lasante lo bann mezir pour kontrol propagasyon viris COVID-19 dan Sesel, in pran serten mezir entern pour asir proteksyon son bann anplwaye, kliyan ek piblik ki servi son servis banker.
“‘Social Distancing’ (‘Gard distans’) i enn sa bann mezir ki’n ganny met an pratik pour kontrol lakantite dimoun ki vin labank a tou moman.
I annan bokou kliyan ki konpran e respekte sa bann mezir ki Komisyonner Lasante in egzize e ki Labank Komersyal Sesel pe osi aplike. Sepandan, i regretab ki apre tou sa bann leksplikasyon ek lenformasyon ki’n ganny donnen lo medya, lo bann lansenny kot labank, ozordi nou’n obzerve ki pa tou dimoun ki pe swiv sa bann direktiv,” sa kominike i dir.
I kontinyen an dizan ki yer annatandan ki labank i ouver son laport pour konmans deservi kliyan, bann ki ti dan laliny andeor labank pa ti pe respekte lenstriksyon ‘social distancing’ ki ti pe ganny donnen par zot anplwaye ek zot zofisye sekirite kot zot ti bezwen lasistans lapolis pour ede met kontrol andeor serten nou brans apre ki serten kliyan pa ti pe respekte bann mezir ki lotorite lasante piblik in met anplas.
Sa labank i rekonnet ki lentervansyon lapolis pa ti pou neseser si tou dimoun ti’n pran zot responsabilite. I oule relans en lapel avek tou kliyan ek piblik an zeneral pour silvouple obzerv konsey ki Lotorite Lasante Piblik in donnen pour gard distans avek kanmarad a tou moman ler zot pe servi bann servis esansyel e sa i enkli kot bann servis banker.
Labank Komersyal Sesel i dir ki i pou fer sir ki tou dimoun ki dan laliny avan son ler fermen pou ganny servis.
I pe enform kliyan ki pandan sa peryod restriksyon labank pou aprezan ouver 8.30 bomaten a 2.30 apremidi Lendi a Vandredi kot brans prensipal Kingsgate House, Victoria e bann zour alternativ (Lendi/Merkredi/Vandredi) kot bann lezot brans, eksepte brans Providans ki pou reste fermen pour le moman. Piblik a ganny enformen si i annan okenn sanzman dan ler loperasyon labank.
I osi ranforsi lapel avek tou kliyan pour rantre kot lakour ler zot fini zot tranzaksyon e silvouple pa reste e groupe andeor labank. Son zofizye sekirite ki’n ganny poste andeor bann diferan brans sa labank pou ranforsi bann regilasyon e pou anpes dimoun reste andeor labank si zot pa pe fer okenn tranzaksyon.
Sa labank i osi remersye tou dimoun pour zot korperasyon e medya pour transmet sa mesaz avek zot. Ansanm nou kapab fer en diferans pour anpes COVID-19 propaze dan nou pei Sesel.
Anviron 15 mil dimoun, ki osi enkli dimoun avek dezabilite, i resevwar lasistans moneter tou le le 15 sak mwan avek Lazans Proteksyon Sosyal kot ladan anviron 10 mil zot peyman i pas atraver labank. Larestan zot pran zot larzan kot biro sa lazans Ocean Gate House ki osi enkli en pti nonm zot, anviron en kenzenn, ki ankor pe ganny peye ‘cash’, dan bis, dan bann distrik lo Mahé, Praslin ek lo La Digue.
Bann portre ki akonpanny lartik i montre en pe lanbyans andeor serten labank ek biro Lazans Proteksyon Sosyal yer bomaten.
Patrick Joubert
Portre: Thomas Meriton
