Distrik Takamaka premye pour anmenn aktivite 250-an depi larive bann premye zabitan |14 March 2020
Takamaka, Yer e Ozordi, en legzibisyon ki pou deroule pandan en semenn dan kad selebrasyon 250-an depi larive bann premye zabitan an 1770, ti ofisyelman ouver yer kot lotel Double Tree by Hilton Seychelles, Allamanda Resort & Spa.
Organize e realize par Ladministrasyon Distrik Takamaka an kolaborasyon avek sa gran letablisman touristik, osi byen ki bann artis e kontribiter ki ban zabitan sa distrik, sa legzibisyon pou ouver pour piblik osi byen ki kliyan sa lotel, pour anmenn zot lo parkour sa distrik pandan bann lannen.
Portre bann zabitan, zenn koman vye, osi byen ki portre e leksplikasyon lo bann sit istorik e pli renonmen dan sa distrik tel ki lekol, Kalorifer Msye Esparon, e legliz Sainte Marie Madeleine, i enpe parmi bann egzibit akote bann lezot portre ki demontre bann talan dan distrik Takamaka.
Pandan seremoni louvertir, detrwa bann artis e zabitan Takamaka ti vin devan pour demontre zot talan e anim sa seremoni ki ti ganny asiste par tyermenn komite pour selebrasyon 250-an e sef egzekitiv pour Bord Tourizm Sesel, Madanm Sherin Francis, sekreter prensipal pour departman kiltir, Madanm Cecile Kalebi, osi byen ki lezot zofisye sa de antite.
Apre plizyer morso artistik par poet Vincent Milius, byensir lo son distrik Takamaka, osi byen ki Raspyek, romans e morso ladans tradisyonnel par en group zenn, legzibisyon ti ofilsye ganny ouver par Madanm Francis ki ti remersye bann zabitan e tou responsab dan sa dirtrik pour reponn lapel komite e pour sa premye distrik pour montre lentere pour partisip dan bann aktivite.
Madanm Francis ti osi sezi sa loportinite pour ankouraz bann lezot distrik pour partisipe e form parti sa gran selebrasyon pour Sesel e pour nou nasyon.
«250-an depi ki bann premye zabitan ti debark lo nou later i devret en katalis pour inifye nou konman en nasyon. E sa i pli relevan la, prezan ki lemonn pe fer fas avek enn bann pli gro kriz ki sa lemonn modern in deza fer fas avek,» Madanm Francis ti dir.
«Nou en nasyon frazil dan en lemonn anba lao. Nou form parti en vilaz global e nou pa ganny eparnye kan i annan bann tel sitiasyon. Antretan, ansanm nou kapab sirmont tou bann lenflians negativ e reste en nasyon ki reste an armoni e ki akey diversite kiltirel. Sa ki fer nou fyer pour en Seselwa e akoz nou devret selebre bann lakonplisman nou nasyon pandan sa bann lannen,» Madanm Francis ti dir.
Madanm Doreen D’Souza, direkter Lotel Allamanda, i dir ki kolaborasyon avek lakominote i en laspe enportan dan loperasyon sa letablisman, ki sezi tou loportinite pour akomod lakominote par ofer lespas pour bann aktivite e lezot fason osi.
«Takamaka i nou distrik, e i enportan pour nou osi ki nou kapab enterakte avek bann zabitan distrik, ki bann viziter i ganny sans enterakte avek nou dimoun e aprann enpe lo ki savedir kreolite e enpe nou kiltir alors bann tel aktivite i donn sa loportinite pour toulede zwenn. I osi en fason pour fer Seselwa konnen ki nou annan pour ofer nou bann rezidan, akoz nou osi fyer pour akomod nou bann rezidan ki viziter,» Madanm D’Souza ti dir.
Sa legzibisyon pou ouver ziska Vandredi prosen, le 20 Mars.
Bann portre ki akonpanny lartik i montre en pe bann moman for sa seremoni yer.
Laura Pillay
Portre : Jude Morel
