Lazournen Enternasyonal bann Madanm – 8 Mars 2020 |07 March 2020
‘En lemonn egaliter i ava en lemonn konplet’
« En lemonn egaliter i ava en lemonn konplet. Legalite ant zonm ek fanm i esansyel pour lekonomi; i a ed kominote pour sirviv. En lemonn egaliter i pli an bonn sante, pli ris, e osi, i pou anmenn plis larmoni ant dimoun. »
Sa in sorti for dan en mesaz par CEPS (Platform Sosyete Sivil) alokazyon
“Anba tenm ‘Zenerasyon Egalite: Realiz Drwa Bann Madanm Pour en Fitir Egal’, lemonn antye pe selebre sa lazournen enportan, en lazournen global pour selebre lakonplisman bann madanm lo nivo sosyal, kiltirel, ekonomik e politik.
“Sa tenm pe osi fer lapel avek lemonn pour akseler aksyon pour anmenm legalite pour madanm pour zot kapab realiz zot bann drwa.
“25enm Lanniverser sa lannen osi, Parlman Eropeen pe selebre 25-an lanniverser lo ‘Deklarasyon Beijing’ lo legalite ant zonm ek fanm.
“Kisisa ‘Deklarasyon Beijing’? An 1991, 4enm Konferans Lemonn lo Madanm ti adopte en rezolisyon lo donn pouvwar, konnesans ek lavansman madanm dan lemonn. Ti donn bann lobzektif stratezik pour kapab annan legalite madanm dan 12 laspe, ki enkli lekonomi; vyolans kont madanm; madanm dan pozisyon pouvwar; dan lanvironnman, etc. Lefe ki sa travay pe ganny fer en Beijing, Lasin, sa rezolisyon i koni konman ‘Deklarasyon Beijing’.
Direkter Egzekitif Nasyon Zini Responsab Pour Madanm in fer en deklarasyon pour sa lokazyon. I’n met lanfaz lo lannen 2020 konman lannen legalite bann madanm. I’n lans en lapel avek tou dimoun pour travay lo sa bann baryer ki pe konstaman al kont legalite e osi detri zefor ki pe fer swa par bann gouvernman, par bann mouvman oubyen lorganizasyon pour anmenn legalite pour madanm. Sa mesaz i tre kler. Nou osi nou devre ede kot nou kapab pour kapab tir tou baryer dan semen bann madanm, menm si parfwa i tre difisil akoz i annan nou madanm ki enkli dan met sa bann lobstak.
“Endividyelman, nou tou nou responsab pour nou prop panse ek aksyon. Annou fer sa ki nou kapab pour fer en diferans dan lavi bann madanm e.g. donn bon konsey e pa lekontrer; amelyor sitiasyon lezot madanm (envit zot pour ganny plis konnesans/swiv bann laklas; fer refleksyon spirityel ki pou amelyor nou prop lavi; etc.); selebre bann lakonplisman (pa zalou lezot). Si nou met ansanm nou bann lide, konversasyon, latitid pozitiv ek nou savwar fer, sa pou anmenn gran lenpak lo sosyete an zeneral. Nou kapab aktivman swazir pour met au defi bann fason fer ki pa dan lavantaz bann madanm (stereotypes). E dan nou lavi toulezour, nou devre pe lager kont aksyon bias.
NOTE : En pti aksyon byen kalkile, i anmenm gran lenpak dan realite.
Kolektivman nou tou nou form parti en pei an antye oubyen lemonn antye. Nou vwar ki legalite bann madann i sitan enportan ki nou pa pou kapab esper ankor plis ki sa. Ki nou kapab fer? Sa i bezwen en koudmen tou dimoun ansanm – pour desid ansanm san kit personn deryer. I pa fasil me i pa enposib. Si nou annan volonte bann madanm, nou pou kapab fer li. Fodre nou eseye. Nou bezwen mobilize e pran aksyon neseser. Sanz fason fer keksoz ki pa anmenn rezilta.
Sakenn de nou i kapab ede pour kree en lemonn egal – kot madanm a realiz zot drwa pli byen. Nou bezwen anmenn bann advocates, pase e prezan, pour demann legalite pour madanm dan sa zenerasyon konmela.
« Ki kantite plis zenerasyon nou bezwen pour ki bann madanm ek fiy zot realiz zot drwa? Ansanm nou kapab konstrir en fitir soutenab pour tou dimoun. Madanm ek fiy zot enportan dan lesey pour trouv solisyon pour bann defi ki zot fer fas avek. Zot bezwen ganny ekoute dan fanmiy ek lasosyete; zot kontribisyon ganny valorize par tou manm fanmir ek lezot ; e osi madanm bezwen ganny selebre atraver lasosyete pour sa ki zot ete.
« An konklizyon, CEPS i oule fer sorti tre for ki en lemonn egaliter i ava en lemonn konplet. Legalite ant zonm ek fanm i esansyel pour lekonomi; i a ed kominote pour sirviv. En lemonn egaliter i pli an bonn sante, pli ris, e osi, i pou anmenn plis larmoni ant dimoun. Alor, batay in fini konmanse: Nou bezwen pran en par ladan e zwe nou rol endividyel e osi kolektiv pour atenn nou misyon.
“Alokazyon Lazournen Enternasyonal bann Madanm CEPS i swet tou madanm ek fiy en bon lafet.”
En kontribisyon CEPS