Konferans lapres par Minis Dezinyen, Madanm Macsuzy Mondon |29 February 2020
«Napa okenn lenstriksyon pour pa donn lenformasyon bann manm Lasanble Nasyonal»
Bann administrater distrik pa’n ganny donnen okenn lenstriksyon pour pa donn lenformasyon bann manm Lasanble Nasyonal e zot pa’n ganny demande pour ouver biro distrik ziska 6er diswar.
Se Minis Dezinyen, Madanm Macsuzy Mondon, ki’n fer sa deklarasyon pandan en konferans lapres yer apremidi kot son biro, Independence House Annex.
Sa konferans de pres i vin an rezilta deliberasyon fer par manm elekte pour distrik Grand Anse Mahé, Msye Waven William ki sorti dan parti United Seychelles ki an minorite dan Lasanble Nasyonal menm si se sa menm parti ki pe diriz pei (legzekitif).
Dan son repons diskour Leta Lanasyon prezante par Prezidan Danny Faure le 20 Fevriye, Msye William ti dir Zedi dan en sesyon Lasanble Nasyonal ki lenstriksyon in fini ganny donnen avek bann administrater distrik (DA) ki lanfaz devlopman pou ganny mete dan sa 10 distrik kot United Seychelles (US) in ganny eleksyon e ki bann administrater distrik in osi ganny demande pour gard biro distrik ouver ziska apre 6er diswar.
Madanm Mondon in demanti sa ki manm Lasanble Nasyonal (MNA) Waven William in dir e in eksplike ki premye miting avek bann DA pour lannen 2020 ti fer Mardi le 25 Fevriye.
«Napa okenn moman ki DA (administrater distrik) in ganny dir ki lanfaz devlopman pou ganny mete dan sa 10 distrik kot US in ganny eleksyon. Zot pa’n ganny donnen okenn lenstriksyon pour pa donn lenformasyon MNA, oubyen pour ouver biro ziska 6er diswar.
«Lo konmansman 2017, apre eleksyon Lasanble Nasyonal, dan premye miting avek DA, nou ti etabli nouvo prosedir travay pour DA ek MNA dan distrik. Nou ti demann tou DA pour travay pros avek bann MNA, e se la osi ki nou ti etabli ki lalis proze dan tou distrik i ganny diskite e sinyen par bann MNA. Nou ti osi rekonmande ki o mwen enn fwa par mwan DA i rankontre zot MNA pour diskit bann size pertinan konsernan zot distrik. Sa i pe marse ziska la konmela,» Madanm Mondon in dir.
I’n azoute ki anplis ki sa, sekreter prensipal pour gouvernman lokal i fer provizyon 2 fwa par lannen pour zwenn bann MNA ek zot DA endividyelman.
«I pa fer sans pour demann DA pour travay ziska 6er diswar akoz an prensip DA napa en ler travay fiks. Nenport ler ki en emergency i arive dan distrik, premye dimoun ki ariv lo teren se DA, a mwen ki i lo konze dokter ou an deor Sesel,» Madanm Mondon ti ensiste.
I ti fer rapel ki proze dan distrik pa ganny fer pour MNA. «Proze i ganny fer pour zabitan distrik. I vre ki tou le-z-an nou ganny retar avek serten proze parey mon ti eksplike dan Lasanble lannen pase e lannen 2019 i pa’n en leksepsyon.
«Pandan prezantasyon bidze lafen lannen, sekreter prensipal pour Gouvernman Lokal, Madanm Marie-Celine Vidot Jeannevol ti osi donn bokou lenformasyon lo sitiasyon pti proze dan distrik.
«Sa lapros travay ki nou’n etabli i ganny mentenir e mon fer en lapel avek tou DA ek MNA pour kontinyen annan sa bon relasyon travay parey plizyer bann onorab in fer resorti dan zot entervansyon,» Madanm Mondon ti azoute.
Lo son kote, Madanm Vidot Jeannevol ti dir ki distrik Grand Anse Mahé in konfirmen atraver son DA ki i zwenn avek son MNA (Onorab Waven William) a plizyer repriz e zot osi diskit lo proze.
Madanm Vidot Jeannevol ti osi konfirmen ki in zwenn avek Onorab William a plizyer repriz dan lepase pour diskit solisyon lo nivo distrik e i osi reponn son bann koud telefonn.
Gerard Govinden