Msye ek Madanm Porice i selebre zot 50-an maryaz |14 January 2020
Msye ek Madanm Porice zour zot ti selebre zot Nosdor
Madanm Elisabelle ek Msye Alfred Porice ki reste Mont Buxton i en lot koup ki’n sanse pour arive selebre zot Nosdor e sa ti Sanmdi le 11 Zanvye dan en bel seremoni ki ti deroul dan Katedral Imakile Konsepsyon, landrwa kot zot ti beni zot maryaz 50-an pase.
Me dan sa enn seremoni sa koup sa voyaz pa ti zis zot de tousel me antoure avek fri zot lanmour; zot bann zanfan, pti zanfan e aryer pti zanfan.
Msye ek Madanm Porice ti aze selman 24 e 23-an respektivman ler zot ti marye e letan i ti adres zot e tou dimoun ki ti prezan pour temwanny sa koup renouvle zot ve ki zot ti fer avek kanmarad 50-an pase, Per David Alcindor ki ti pe prezid sa seremoni ti fer resorti ki ti sa langazman ki zot ti’n fer pour partaz zot lavi antye avek kanmarad, konfyans dan zot lanmour pour kanmarad e zot krwayans dan Bon Dye ki’n fer zot reste tou sa letan ansanm menm si 50-an pase zot ti napa en lide ki ti kapab arive dan zot parkour lavi.
Madanm Porice i dir ki se par lagras, benediksyon e proteksyon Bondye, bokou lapriyer e osi en lanmour ki for e solid ki fer en maryaz dir lontan.
«Nou’n fer bokou lapriyer pour demann Bon Dye bokou lagras pour nou kapab viv ansanm pour tou sa kantite letan,» Madanm Porice i dir. I ti azoute ki zot in fer zot mye pour elve byen zot bann zanfan e ozordi zot fyer ki zot tou pe byen viv zot lavi e ki zot pe met an pratik tou sa ki zot in aprann avek zot paran.
