Trwazyenm-az i transmet savwar-fer artizanal avek en group zenn |13 January 2020
En kenzenn partisipan ki ti pran par dan en latelye kreativite e inovasyon avek fey koko ti egzibit zot bann morso travay tel ki sapo trese ek kapatya, osi byen ki resevwar zot sertifika pandan en seremoni kot Vilaz Artizanal, Au Cap Vandredi apremidi.
Bi sa latelye, realize par Group Artizan Sesel (GAS) avek sipor Mauritius Commercial Bank (MCB) Seychelles Ltd, sete pour partaz konnesans artizanal avek bann zenn par montre zot fer bann prodwi ki osi annan en valer ekonomik.
Pandan sa latelye kat zour ki ti konmanse le 6 Zanvye, enstrikter Emanuel Freminot, ki en artizan byen eksperyanse e talante, ti demontre bann teknik ek prosedir pour prepar fey koko, netwaye pour asire ki napa okenn zensek lo la, met sek dan lonbraz, e osi trese pour fer sapo, kapatya, pers, parmi lezot lobze.
Prezidan Group Artizan Sesel (GAS), Jeannie Ah-Kong, i dir ki i ti deside organiz sa latelye an swivan en progranm kot lekol Pointe Larue kot i ti angaze avek bann etidyan Ledikasyon ek Formasyon Teknikal e Vokasyonnel (TVET) lekol Pointe Larue e i ti vwar ki i annan ki enterese pour aprann bann form lar artizanal.
«Sa lannen nou’n perdi kat manm dan nou group e tou nou group artizan i aze. Alors mon’n deside ki sa i le moman ki nou devret pe transfer sa savwar-fer avek bann zenn. Parey ou konnen, souvannfwa i annan en gap ant sa de zenerasyon e parfwa zot vwar li difisil pour travay ansanm. Mon’n deside ek sa bann manrmay lekol pas de zour par semenn pour enterakte avek zot e la nou annan 12 ant sa bann marmay ki swiv bann progranm fidelman,» Mis Ah-Kong ti dir.
«Nou satisfe avek lakantite ki’n partisipe akoz nou’n ganny trwazyenm-az osi byen ki zenn e ansanm zot in kapab travay e aprann ansanm. Tou bann partisipan, menm si oparavan zot pa ti’n travay avek fey koko, zot in kapab prodwir de ou trwa sapo e la zot annan en tes pour al kre zot sapo dan lakour. Sapo fey koko i vann en kantite sirtou avek touris,» Mis Ah-Kong ti eksplike.
GAS i annan en pti kyosk kot vilaz kot i osi vann bann prodwi ki bann manm i fer. Dapre Mis Ah-Kong, en sapo ki’n fer avek fey koko i ganny vann avek bann lotel pour R35 ou R45 kan zot aste an gran kantite.
«Nou bezwen atrap bann zenn e travay ansanm avek sa bann pli aze pour transmet sa savwar-fer. Matyer premyer i fasil pour gannyen e la zot in ganny bagaz ek teknik ki fasil pour zot prodwir e i bann keksoz ki annan en valer ekonomik. Menm lo en lans, en zenn i kapab rod son fey koko, asize lo lans e fer e vann avek bann touris. Kan en dimoun in byen abitye, i posib pour fer 5 sapo ou kapatya par zour,» Mis Ah-Kong ti azoute.
GAS pe anvizaze fer ankor latelye dan le fitir pour anmenn ansanm bann partisipan diferan laz. Pour prosen proze, i pe anvizaze fer en lot latelye avek Lenstiti pour Lar (SIAD) pour met bann pli aze azour avek teknolozi modern tel ki konpiter ek lezot.
Bann portre ki akonpanny lartik i montre en pe bann moman for klotir sa latelye.
Teks : Laura Pillay
Portre : Thomas Meriton
