John Vidot i ganny trouve mor |28 December 2019
Lapolis in raporte ki John Vidot, en mekanisyen 51-an in ganny dekouver mor dan distrik Bel Air yer bomaten. Sa pa ti tro lwen avek lakaz lafanmiy Madanm Elizabeth ek Msye Hertel dan en pti ranpar.
Dapre rapor Msye Vidot ti’n vin fer serten louvraz mekannisyen kot Msye Hertel Zedi pandan lazournen e i ti’n reste e dormi lanmenm kot sa lakour.
Ti ver 4er30 bomaten ki Msye Hertel ki sa letan ti pe travay ti enform lapolis ki i ti’n aprann ki John ti’n kit lakaz.
Sete zofisye dog unit ki ti’n servi en kote savat pour John ki ti trouv li pa pe respond parmi bann feyaz (lalyann). Sa dekouvert ti ganny fer ver 6er30 bomaten.
Lapolis pe fer lanket dan sa ka annatandan rezilta letopsi ki ekspekte fer ozordi bomaten pour determin lakoz son lanmor.
****
Benny Belmont i mor an rezilta konplikasyon avek son leker
Letopsi fer lo lekor Benny Belmont, en zonm 46-an ki reste Anse Aux Pins e ki ti ganny trouve mor dan sa menm distrik Merkredi bomaten, in etablir ki lakoz son lanmor i an rezilta konplikasyon avek son leker.
****
En zonm i ganny riman apre ki in met dife dan lakaz
En zonm 52-an ki reste Anse Louis in ganny arete ver 6er40 yer bomaten apre ki in met dife ki’n bril plafon avek enpe lenz dan lakaz kot i ti p e reste avek son fanmiy yer granmaten.
Rapor ki sa zonm ti pe fer problenm ti ganny fer avek lapolis ver 2er30 bomaten e enpe letan apre ler sa zonm ti trouv gard vini i ti anvoy petrol, alim dife apre taye.
Sa sispe in ganny anmenn ankour kot in ganny rimann ziska le 8 Zanvye.
Patrick Derjacques i ankor manke
Lapolis in dir ki malgre zot loperasyon resers pour retrouv Patrick Derjaques in satire i pe kontinyen avek lanket an relasyon avek son disparisyon.
Lapolis i azoute ki tou lenformasyon resevwar pour ganny trete avek konfidansyalite e pou ganny azir lo la.
Nenport endividi alor ki annan oubyen ki aprann okenn devlopman dan disparisyon Msye Derjacques silvouple pa ezite pour kontakte kordgard pli pre oubyen biro CID.
Kominike Lapolis