Mesaz Nwel/Christmas message/Message de Noel |24 December 2019
Larsevek Wong
‘Ou pa kapab fonksyonn avek sikse si ou napa lespwar dan Bondye’
“Mon bann ser ek frer,
«Mon salye zot dan non Zezi. Mon swete ki zot in fer en preparasyon beni pandan sezon lavan e ki zot in byen pare pour selebre Lafet Lenkarnasyon Bondye.
«Tou dernyenman, konman en nasyon, nou ti antann sa kote nwanr nou listwar kot i konsern koudeta 1977. Pour bokou nou sa in vin en sok pour dekouver konsekans sa koudeta, ek bann fleo ki pe afekte nou zoli paradi. Malerezman, nou’n antann bann dimoun ki’n disparet, bann ki’n ganny tortire, bann ki’n ganny met dan kaso, e menm bann ki’n ganny touye akoz zot ti bann lennmi larevolisyon. Dan lentere nasyonal gouvernman in pran later ilegalman, bann endividi ek bann fanmir in ganny forse pour egzile. …
«Mon bann ser byenneme, o milye sa fernwanr e teneb, lanz i dir avek tou Seselwa: i annan Bon Nouvel ki donn bokou lazwa.
“10 Me lanz ti dir zot, ‘Pa per! Mon annan en bon nouvel pour zot, ki pou donn lepep antye en gran lazwa: 11 Ozordi en Sover in ne dan lavil David. Li menm Kris, Senyer.” Lik 2:10-11
«Wi, mon bann ser ek frer, i annan en mesaz lespwar anvi ki selebrasyon Nwel i mark nesans Zezi Kri, sa Sover lemonn, lenkarnasyon Garson Bondye Vivan, e lespwar pour lemonn. Son nesans ti ganny predir plizyer fwa par bann diferan loter lansyen testaman e anplenntan i ti ne par Lavyerz Mari.
« Dan antisipasyon son larive, Ezai ti profetize: “Me fernwanr pa pou reste touzour lo later kot konmela, i annan langwas…Lepep ki ti pe marse dan fernwanr in war en gran lalimyer. Bann ki ti pe viv dan en pei fernwanr, en lalimyer ti briye lo zot.” Ezai 9:1-2. Nwel, pour nou, bann Kretyen e osi byen ki lemonn antye i selebre larive Lalimyer lemonn ki konkerir fernwanr.
« Mesaz nesans sa Sover, parey ti ganny delivre an premye, par sa lanz, i ‘Bon Nouvel ki donn bokou lazwa’. Sa i mon mesaz pour ou, mon bann fer ek ser pelren dan nou vwayaz lo later e osi byen, sa i mesaz legliz pour lemonn dan sa sezon Nwel, e byensir i pour tou dimoun partou, bann endividi ek bann nasyon.
« Letan nou selebre Nwel 2019, nou anmenn pour tou dimoun sa bon nouvel ki donn bokou lazwa ek lespwar. Lemonn ozordi i dan gran bezwen en Sover.
Ti annan e i ankor annan fernwanr dan tou bann landrwa, non pa zis dan domenn fizik me osi dan lemonn spirityel, ki anmenn en gran lafreyer e ki abes moral parmi bann zonm, bann fanm, bann zenn e bann zanfan. Sa i arive letan ki Lalimyer lemonn, Zezi Kri i ganny rezete. Ezai i profetize: ‘Parkont, sa peryod obskirite ek dezespwar pa pou dir pour toultan.’ Me kot Lalimyer pa ganny rekonnet oubyen resevwar (Zan 1:10-11), teneb spirityel pou pran plas.
‘19 La ki mannyer Bondye pou pas son zizman: Lalimyer in vin dan lemonn, me akoz zot bann move aksyon, dimoun in pli kontan fernwanr.’ Zan 3:19.
« Sa lannen in en lannen kot lepep Seselwa ki ti pe viv dan fernwanr lye avek koudeta, in konmans vwar lalimyer. Annefe, sa lalimyer in konmans penetre letan ki bann manm lasanble nasyonal ti propoz kreasyon Konmisyon Laverite, Rekonsilyasyon ek Linite Nasyonal (TRNUC) e ki Prezidan ti donn son konsantman.
Bokou Seselwa in konfese ki zot ti inyoran konsernan listwar Sesel e aprezan zot lizye e lespri in ouver, anver bann realite enportan listwar nou pei. Nou bezwen re-ekri nou bann liv listwar. Wi, en nouvo zour in arive pour nou dan Sesel.
I pa enportan dan ki leta en endividi i ete, ki swa entelektyel oubyen ris, ouswa ki degre devlope en nasyon i ete, si napa Lalimyer Kris, ou bite dan fernwanr.
Lekritir Sent i dir: ‘Ensi, akoz zot in refize rekonnet Bondye, Bondye in les zot ale avek zot lespri deregle dan bann pratik onte ...’ (Romen 1:28-31). Malerezman, sa i deskripsyon kler nou lemonn ozordi, ki anmenn sagrinasyon lo limanite.
« Sa bon nouvel ki donn bokou lazwa sa Nwel i ki, Zezi Kri, Lalimyer lemonn, i deklare: ‘Mwan menm semen, laverite ek lavi. Personn pa kapab ariv kot mon Papa san pas par mwan.’ ‘Vin kot mwan zot tou ki fatige anba en fardo; mwan, mon ava donn zot repo.” (Zan 14:6; Matye 11:28).
« Par konsekans, dan milye bann dezord lemonn otour nou, bann diferan manifestasyon ek lagrev an Chile, Bolivia, Hong Kong, La France, zis pour nonm enn de, realite koudeta Sesel e sirtou dan demars pour eleksyon prezidansyel 2020, vre lape ek repo ki konkerir tou lafreyer i kapab ganny trouve dan Kris, Emannyel (Bondye i avek nou. Ezai 7:14; Matye 1:23).
« Parfwa, ki ou ete oubyen ki kondisyon lavi ou ladan, ou pa kapab fonksyonn avek sikse si ou napa lespwar dan Bondye. Si sirkonstans i pa bon, ou definitivman bezwen lespwar e si tou i bon, ou bezwen lespwar ki tou pou reste parey.
Lenvitasyon pour viv en lavi dan e avek Zezi, i Bon Nouvel e i sa enn ki donn bokou lazwa, i al ver tou imen parey, ris oubyen pov, edike oubyen non, blan oubyen nwar, Kretyen oubyen bann ki pa Kretyen.
Mon swet zot en zwaye nwel e en nouvo lannen 2020 beni dan prosperite.
Ansanm pour son laglwar.
Ou frer pelren lo nou vwayaz lo later.
Larsevek James Wong Yin Song
Dyosez Anglikan Sesel