Lasanble i aprouv sanzman dan Lalwa Saler Servis Piblik 2013 avek lezot lamannman |05 December 2019
Prozedlwa pour amann Lalwa Saler Servis Piblik 2013 ti retourn ankor dan Lasanble Nasyonal yer bomaten kot plizyer propozisyon lezot lamannman ki parti mazoriter LDS ti’n fer ladan ti ganny diskite e konsidere avan ki bann manm sa parti osi byen ki manm US pour Grand Anse Mahé Waven Willliam ti vote pour donn zot laprouvasyon.
Sa prozedlwa ti’n ganny table depi Mars e i ti annan pour bi amann Lalwa Saler Servis Piblik 2013 pour adres dan en fason sistematik lapros gouvernman pour regilyerman fer sir ki i annan en logmantasyon relevan pour bann travayer dan servis piblik e dan sa lenstans en logmantasyon 5% ti’n propoze.
Me LDS pa ti dakor lo fason sa logmantasyon 5% ti pe ganny distribye kot bann ki lapey i pli ba ti pou ganny en logmantasyon mwens ki 300 roupi e bann ki lapey i pli o ti pou ganny ant 3000 a 4000 roupi. LDS i dir zot pa dakor bann ki lo saler minimonm i kontinyen ganny mwens e sa ki ganny gro saler zot zot pou kontinyen benefisye plis.
Alor bann lamannman ki zot in travay lo la e vin avek ki manm elekte pour Anse Etoile Ahmed Afif ti prezante yer i enkli en nouvo latab saler ki i ti eksplik an detay ki mannyer pou marse e ki i dir fason sa 62 milyon roupi ki’n bidzete pou ganny distribye dan en fason pli zis avek bann travayer dan servis piblik kot tou dimoun ava ganny 450 roupi ki pou ganny back pay depi Avril ziska Desanm.
Lo son kote manm parti US Sebastien Pillay ti fer resorti ki sa latab saler ki LDS in propoze i pa ekitab akoz i pou nesesit en revizyon toulezan e sa pou fer li pli konplike pour fer logmantasyon saler.
I ti fer remarke ki atraver sa bann propozisyon LDS pe adopte en sistenm ki in toultan kont e sa se mank respe, lapresyasyon, ek rekonnesans pour travay dir.
“Nou bezwen apresye lefe ki i annan dimoun ki’n struggle e fer bokou sakrifis pour ariv kot zot ete parey en dokter e ozordi ou pa kapab dir li i pou ganny en rediksyon dan logmantasyon ki i ti pou gannyen dan son saler akoz en sitiasyon difisil dan pei,” Msye Pillay ti dir.
A sa pwen i ti eksplike ki gouvernman i rekonnet difikilte bann dimoun ki pli vilnerab e ki zot lapey i pli ba.
I’n fer resorti ki gouvernman in donn 500 roupi lo saler minimonm, long service allowance parmi lezot konsiderasyon parey lasistans sosyal, lakaz, lòn parmi lezot ankor. I dir LDS pa’n onor son lagreman ki in fer avek Lasanble. I dir dan son bann leksplikasyon Msye Afif pa’n fer referans avek sa group dimoun parey ners, ansennyan, lezot profesyonnel dan bann minister, bann career public servants, bann middle class ki pou perdi ant 100 a 600 roupi atraver sa propozisyon LDS.
Lo son kote dirizan lopozisyon Msye Wavel Ramkalawan in fer resorti ki bann profesyonnel e tou lezot dimoun ki’n fer sakrifis zot ganny rekonnet atraver diferan kalite allowances parmi lezot benefis e fodre pa ki nou anbet dimoun avek sa bann kalite largiman.
I ti osi fer remarke ki bann lorganizasyon enternasyonal in toultan koz lo sa gran disparite ki egziste dan distribisyon larises e se sa ki LDS pe adrese.
Minis Loustau-Lalanne lo son kote in fer resorti ki parti US in toultan krwar dan logmantasyon pour travayer e se li ki’n entrodwir saler minimonm, pansyon pour dimoun aze e gouvernman in mentenir son langazman pour kontinyen get dan byennet bann dimoun ki ganny mwens.
Marie-Anne Lepathy