Lasanble i repran deba lo prozedlwa pour amand Lalwa Saler Servis Piblik 2013 |04 December 2019

Lasanble pou dan son sesyon ozordi bomaten repran diskisyon lo prozedlwa pour amand Lalwa Saler Servis Piblik 2013 ki ti ganny anvoye pour plitar depi an Mars sa lannen apre ki parti mazoriter pa ti dakor lo fason sa logmantasyon 5% ki ti pe propoze ti pou ganny distribye.

Sa i akoz zot dir sa ki ganny saler minimonm pou kontinyen ganny mwens e sa ki ganny gro saler zot, zot pou kontinyen benefisye plis e zot ti’n demande ki tou dimoun i ganny menm sonm.

Sa kestyon in ariv ankor devan Lasanble swivan lanons ki Prezidan Danny Faure in fer sa wikenn dan son kapasite konman responsab ladministrasyon piblik pour en allowance lo saler tou travayer dan servis piblik apard bann dimoun dan pozisyon konstitisyonnel.

Swivan sa lanons, yer Vis-Prezidan Vincent Meriton lo lapar Prezidan Danny Faure ki annan portfey Servis Piblik ansanm avek Minis Finans, Komers, Lenvestisman ek Planifikasyon Ekonomik Msye Maurice Loustau-Lalanne ti vin reponn en kestyon irzan dan Lasanble lo sa size demande par dirizan lopozisyon Msye Wavel Ramkalawan.

Msye Ramkalawan ti anvi bann leksplikasyon kler avek Vis-Prezidan Meriton ek Minis Loustau-Lalanne lo sa desizyon legzekitiv e sa ti enkli;

- si sa supplementation allowance i ekivalan en logmantasyon dan saler debaz bann travayer servis piblik

- dan ki bidze sa larzan pou tire

- ki pe arive avek sa lobligasyon pour reviz grid saler pour travayer servis piblik parey lalwa i demande ki i ganny fer tou le 5-an

- anba ki provizyon lalwa ki sa allowance enkli son back pay pe ganny fer.

Vis-Prezidan Meriton ti eksplike ki sa supplementation allowance pa en logmantasyon lo saler debaz travayer.

“Saler debaz pou reste parey akoz latab saler pa ankor sanze. Ler i sanze sa bann supplementation allowance pou ganny enkorpore dan saler debaz travayer,” Vis- Prezidan Meriton in fer resorti.

I’n dir ki larzan pour sa bann allowances pou sorti dan bidze 2019 ki ti’n fini aprouve. Sa 5% ti ganny enkli pour finans bann logmantasyon lapey travayer baze lo nouvo latab saler e ki ti pibliye an Avril sa lannen konman regilasyon anba lalwa Public Service Salary Act 2013 e ki Lasanble ti quash.

Vis-Prezidan i dir ki anvi desizyon Lakour Konstitisyonnel ki Lasanble pa bezwen donn okenn rezon valab pour anil en regilasyon, sitiasyon aktyel se ki latab saler 2014 i reste anfors.

“Lapey tou bann constitutional appointees i ganny spesifye anba diferan lalwa e dan sak sa bann ka i fer referans avek en band ek step spesifik,” VP Meriton ti eksplike.

I ti dir ki vi ki sa latab pa’n ganny amande, tou bann constitutional appointees pou kontinyen ganny peye dapre latab saler ki an viger e zot pou bezwen esper adopsyon en nouvo latab saler pour zot kapab benefisye avek en logmantasyon saler. Sa bann constitutional appointees i enkli prezidan, vis-prezidan, minis, manm Lasanble Nasyonal, sef ziz, prezidan Lakour Dapel parmi lezot ankor. Pour bann zofisye piblik ki zot lapey pa ganny spesifye direkteman dan en lalwa, Vis- Prezidan Meriton i dir Legzekitiv in touzour annan pouvwar pour donn en logmantasyon saler bann travayer anba sistenm bon zesyon resours imen.

“Prezidan in servi son pouvwar egzekitif pour donn en suppelementation allowance 5% pour bann travayer servis piblik ki zot lapey dan latab saler i fleksib e sa i annakor avek en langazman ki i ti donnen pli boner sa lannen,” Vis-Prezidan Meriton ti eksplike e i ti ensiste ki sa supplementation allowance pa pou sanz zot saler debaz ziska ki en nouvo latab saler i ganny adopte.

VP Meriton i dir gouvernman in egzekit son lobligasyon legal kot i konsern revizyon lalwa lapey servis piblik e sa i atraver piblikasyon en lamannman dan lalwa an Fevriye e SI 18 pour lannen 2019 an Avril.

Vis-Prezidan Meriton in osi dir ki Prezidan i ganny son pouvwar egzekitiv dan Konstitisyon e sa supplementation allowance i reste toultan en prerogativ legzekitiv parey in fer dan bann scheme of service ek bann logmantasyon atraver gouvernman pandan sa dernyen 5-an e parey in toultan fer.

Vis-Prezidan Meriton i dir dimoun ki pou benefisye anba sa desizyon prezidan se gran mazorite travayer servis piblik ki nou bann frer ek ser Seselwa.

Lo son kote Minis Loustau-Lalanne ti siport sa ki Vis-Prezidan Meriton ti’n dir konmkwa sa sonm 62 milyon roupi pour pey sa allowance i deza dan bidze pour logmantasyon saler par 5%.

“Bidze 2019 in fini ganny aprouve e nou pe servi sanmenm sa sonm pour donn sa allowance. Seksyon 9 Prozedlwa ki gouvern zesyon finans piblik i dir ki gouvernman pa kapab depans an plis ki sa sonm ki’n ganny bidzete e aprouve par Lasanble Nasyonal. Gouvernman pa pe kas okenn lalwa akoz sa sonm i ankor parey ti’n aprouve e sa se sa 62 milyon roupi,” i ti dir.

Msye Ramkalawan ti dir ki sa desizyon ki’n ganny pran i montre mank senserite lo lapar gouvernman akoz i dir apre ki Lasanble ti’n eksprim son rezervasyon apre ki lalwa ti’n table devan li, ti annan en miting avek Prezidan Faure State House kot apre Prezidan ti etabli en komite e diskisyon ti fer avek lede parti dan Lasanble e sete sa ki ti montre senserite e lanvi pour trouv meyer solisyon. Me apre sa zafer ti al an kour e la kot ti konmans annan mank senserite e diskisyon in arete akoz zafer ti ankour e la lakour in finalman rann son zizman.

Msye Ramkalawan i dir sete Legzekitiv limenm ki’n met retar dan bann diskisyon akoz sa lalwa i ankor devan Lasanble me akoz sa zafer avek lakour Lasanble pa kapab diskit en keksoz ki ankour.

“Me vi ki lakour in dir klerman ki legzekitiv ek lezislativ i bezwen koze pour kapab trouv en solisyon dan sa zafer, akoz ki legzekitiv pa’n swiv konsey ki Lakour Konstitisyonnel devan ki limenm i ti anmenn son ka pour asize e adres sa size?” Msye Ramkalwan ti demande.

I ti fer rapel ki largiman LDS ti ki tou dimoun i ganny menm sonm egal 450 roupi sakenn. Eski gouvernman i pare pour swiv sa ki lakour in demande pour asize e koze akoz LDS li i pare pour kontiny diskisyon.

I ti osi demann leklersisman lo si gouvernman in sanz formil pour desid konpansasyon vi ki i baze lo saler e saler i sa ki dan grid saler e ladan pa enkli okenn allowance e osi ki pou arive avek sa allowance letan grid saler pou ganny revize.

Letan i ti reponn bann kestyon Vis-Prezidan Meriton ti eksplike ki in annan senserite toudilon bann diskisyon lo lapar gouvernman e zot in ekout rekonmandasyon bann ekspert ek teknisyen dan servis piblik e i ti fer rapel ki atraver bann deba ki’n annan tou dimoun ti dakor lo sa 5% logmantasyon.

I dir ki propozisyon LDS pour donn tou dimoun menm sonm pour anmenn en debalans dan latab saler servis piblik e i reflekte en mank apresyasyon leksperyans, konnesans ek konpleksite travay tou nou bann profesyonnel si nou pran en tel lapros.

Vis-Prezidan Meriton in eksplike ki ler en nouvo latab saler servis piblik ava adopte sa allowance ava form parti saler debaz pour kapab compute depi 13enm mwan saler, konpansasyon ek lezot benefis.  

Konsernan formil konpansasyon Vis-Prezidan in eksplike ki servis piblik i ganny egzanpte anba lalwa lanplwa me gouvernman in adopte formil ki donn plis benefis e en meyer konpansasyon pour bann travayer dan servis piblik.

Sa size ti anmenn bokou kestyon ek deba me finalman sa ki kler se ki travayer servis piblik pou ganny zot supplementation allowance e zot pou ganny backpay depi Avril ziska Desanm.

Marie-Anne Lepathy