Profil childminder Mestella Auguste : “Konmela mon fer plis aktivite edikasyonnel avek bann zanfan» |19 August 2019

Mestella Auguste

Parfwa lavi i annan son prop fason anmenn ou dan en lot direksyon ki menm anmenn ou ver dekouvert en nouvo pasyon, en nouvo dedikasyon. Se sa ki’n arive avek Madanm Mestella Auguste ki letan i ti arete konman en travayer simityer ti dekouver lazwa dan vey bann nouvo ne.

“Letan mon ti konmans vwar ki larzan ki mon ti pe gannyen kot mon ti pe travay kot simityer ti nepli bon, mon ti deside al vey zanfan. Mon ti vey aprepre douz zanfan. Sa in sanz mon lavi,” Mestella, ki reste Glacis, i eksplike.

I dir ki letan IECD ti anonse ki i pou fer bann formasyon, i ti partisipe san mank okenn sesyon. I ti telman anvi amelyor sa ki i ti pe fer.

“I ti pran mwan enpe letan pour deside si mon pou anrezistre me apre mon’n fer li an 2017. Mon ti anvi vey set zanfan me selman vi ki mon pe travay tousel mon’n bezwen pran selman senk parey IECD i rekonmande,” i dir nou, e sa annefe i anliny avek bann standar nasyonal pour bann dimoun ki vey zanfan konman en profesyon.

Ziska prezan dan son rezyon napa okenn daycare e i dir ki bokou paran i apros li pour vey plis zanfan me sa pa posib. Ansemoman sa senk zanfan ki i okipe i aze ant 4 mwan a 3-an.

“Konmela mon fer plis aktivite edikasyonnel ek bann zanfan. Zot aprann konte, let alfabet, penn, en kantite pti keksoz ankor. Me i annan ki ankor tro pti, zot oule manz kreyon letan ou donn zot en aktivite pour fer, selman mon konpran sa, sa i normal pour zot laz,” Mestella i rakonte.

Dan ka Mestella, i pa anmenn bann zanfan fer bann aktivite fizik andeor tel ki al ‘Baby gym’ akoz i dir ki i annan zanfan ki annan problenm medikal. Alor, paran in agree ki zot pa fer sa bann aktivite.

“Bann formasyon ki IECD i donnen i bon. Mon satisfe ki mon’n aprann enpe plis lo bann keksoz ki mon pa ti konnen,” i dir avek bokou konviksyon.

Mestella i admet ki depi ki i’n konmanse, i’n fer bokou depans lo li menm. Toudmenm, sa larzan ki IECD i donnen pour demar biznes in ed li pour repenn lakaz, aste nouvo sez, zouzou ek bife pour met sak zanfan. 

“La mon annan plan, petet dan ankor de trwa mwan, fer met en pti slab beton deor ki zanfan ava annan en landrwa pli konvenab pour zot al zwe deor,” i dir.

I dir nou i panse ki nide pour kree IECD i bon, i la pour ed zot e siport zot.

Mestella i dir ki son travay i permet li annan bon konfor akoz i pa’n zanmen kontan travay dan gran group.

“Mon annan 59-an ansemoman e si mon lasante i permet mwan mon pour kontinyen ziska ler mon nepli kapab. Si non letan ki mon ganny 60-an e mon kalifye pour mon pansyon, mon ava arete,” i dir nou apre ki i’n pran de trwa minit pour mazin lo son fitir.

Toudmenm i pe kontinyen fer son travay avek bokou lanmour e an swivan tou bann regilasyon ki standar nasyonal in met anplas.

En kontribisyon IECD