Follow us on:

Facebook Twitter LinkedIn YouTube

Domestic

Travay renovasyon lo lopital Baie Ste Anne Praslin pou konmanse semenn prosenn  Travay renovasyon lo lopital Baie Ste Anne Praslin pou konmanse semenn prosenn   |16 September 2021

Travay renovasyon mazer lo lopital Baie Ste Anne Praslin pour adres problenm koule, pour sanz plafon, tret mwasi parmi lezot ankor, pou konmanse semenn prosenn e i ekspekte pran anviron wit mwan pour konplete e kontrakter pour sa proze i deza lo sit pe fer bann preparasyon.

Se Minis pour Lasante Peggy Vidot ki ti donn sa lenformasyon devan Lasanble Nasyonal yer letan i ti pe reponn en kestyon irzan par MNA pour distrik Baie Ste Anne, Msye Churchill Gill.

Msye Gill ti anvi konnen kwa ki Minister Lasante in kapab adrese e kwa ki pa ankor ganny adrese e kan ki sa minister i ekspekte adres sa bann issues ki pa ankor ganny adrese e sa i apre ki bokou keksoz pertinan ti ganny fer sorti atraver dernyen vizit ek miting ki ti swiv letan Minis Vidot ti vizit sa lopital le 13 Out sa lannen.

Minis Vidot i dir ki pandan sa vizit ansanm avek le trwa MNA Praslin – Onorab Churchill Gill, Onorab Waven Woodcock ek Onorab Doyace Porice – i ti ganny en apersi profon lo sitiasyon e leta lopital Baie Ste Anne e osi lo bann problenm lasante ki sa de distrik pe fer fas avek e ansanm zot ti diskit lo bann fason pour amelyor servis lasante lo sa zil.

Apard sa bann diskisyon, Minis Vidot ti osi vizit bann fasilite ek servis e osi rankontre bann travayer Lopital Baie Ste Anne ki ti profite pour met zot bann konsern a son latansyon.

“Parmi bann keksoz ki nou’n kapab adrese ziska prezan apre mon vizit se revwar sa sistenm nimerik kot resepsyon pour fer lanrezistreman bann pasyan e sa i tonb dan kad premye faz zefor pour roll out sistenm lenformasyon lasante ki pe osi ganny fer lo Mahé.

DICT in retabli enternet e in enstal en ordinater pour permet bann travayer fer sa bann lanrezistreman,” Minis Vidot in fer resorti.

I’n osi dir ki bann klinik spesyalize osi pe al rekonmanse, biro lasante piblik in fini bouz dan en lot lokasyon pour fer plis lespas pour farmasi, servis kominikasyon ek sipor in ranforsi pour asire ki keksoz debaz pa manke dan lopital, bann fourniser servis ek kontrakter in ganny peye e minister in aste de nouvo laponp pour ede rezourd problenm avek sistenm tretman desarz kot sa lopital. 

Minister in ganny lasistans enzenyer PUC pour enstal sa de laponp.

Me parkont parmi bann keksoz ki Minis Vidot i dir son minister pa ankor kapab arive akonpli i enkli fer CT Scan ariv Praslin. Me i dir sa i ekspekte rezourd byento letan ordinater ava enstale dan lasal konsiltasyon dokter.

Servis psikolog ek occupational therapy osi pa ankor kapab entrodwi, ultrasound osi lalis espere i ankor long menm si minister pe fer son mye pour rakoursi li, sitiasyon laundry osi i ankor pe ganny revwar.  

Me Minis Vidot in fer konpran e reasir bann MNA e osi bann zabitan Praslin ki lemoman pou arive kot tou sa bann keksoz pou ganny adrese.

Minis Vidot ti osi reponn plizyer lezot kestyon par diferan MNA konsernan bann size ki tonb anba son minister.

 

Marie-Anne Lepathy

More news