En Zimbabween i mor swivan en lensidan kot Ros Sodyer |26 August 2021
En zenn zonm aze 27-an avek nasyonalite Zimbabween ti ganny prononse mor yer par en dokter kot sant lasante Anse Royale swivan en lensidan ki ti arive kot Rock Pool (Ros Sodyer), Takamaka, lapolis in raporte.
Lapolis in raporte ki ver 3er yer apremidi zot ti resevwar en koud telefonn kot stasyon lapolis Anse Royale par en madanm, ki ti pe demann lasistans apre ki zot ti’n al vizit Rock Pool (Ros Sodyer) Takamaka avek 2 son koleg garson. A en serten moman, enn parmi sa de garson ti sot dan basen delo e la kot i ti ganny tape par en laroul ki ti tir li dan basen e trenn li ver kannal andeor sa basen. Son lot koleg garson ki ti osi avek li lo ros ti esey al sekour li e la en lot laroul ti tap li e zet li dan kannal li osi.
Letan ki lasistans life guard ti ariv kot sa lensidan ti’n arive, sa de garson ti ankor an detres dan lanmer. Zot ti ganny retire e anmenn ater lo sek kot zot ti resevwar lasistans medikal e ganny transporte kot sant lasante Anse Royale.
Enn parmi sa 2 zenn zonm, en Zimbabween aze 27-an ti ganny prononse mor par en dokter kot sa sant lasante. Sa lot zonm in ganny transporte Lopital Sesel pour plis lentervansyon medikal, me son kondisyon i stab.
Kominike lapolis