Antretyen avek Aubrey Pon-Waye, en zenn ki pe swiv formasyon pour vin en pret dan Dyosez Katolik «Mon kontan swa ki mon’n fer e mon vreman zwaye avek bann lakonplisman ziska prezan dan mon lavi» |22 August 2021

Aubrey Pon-Waye

Aze 30-an, Aubrey Pon-Waye i enn parmi trwa zenn seminaris ki pe swiv formasyon aletranze pour vin pret dan Dyosez Katolik e ki an se moman dan pei lo vakans.

Ti kot Domus kot i pe reste ki sa semenn mon ti rankontre sa zenn garson tre dinamik ki ti partaz avek mwan akoz in fer sa swa e son parkour pour reste fidel e angaze dan swa ki in fer pour donn son lavi Bon Dye e Legliz e travay o servis lezot.

Zournal Seychelles NATION i anmenn ou parkour sa zenn zonm ki’n deside donn son lavi Bon Dye.

Ti a laz 15-an ki sa zenn garson i dir i ti fer son premye rankont personnel avek Zezi Kri. I dir i ankor rapel tre byen sa zour ‘Fet Dye’ Anse Etoile dan son parwas letan i ti pe swiv laproseyon Sen Sakreman ki i ti eksperyans en santiman tre spesyal dan son relasyon avek Zezi Kri.

«A sa moman mon ti santi ki Bon Dye dan en fason spesyal ti pe koz avek mwan e i ti pe dir mwan ki mon annan valer e ki i kontan mwan parey mon ete e ti a sa moman la osi ki mon ti sezi ki Bon Dye i kontan mwan e sa ti en leksperyans e en santiman enportan pour mwan. Sa moman in toultan mark mwan e reste en pilye dan mon lavi,» Aubrey i rakonte.

Ki mannyer pour tenir son langazman

Me Aubrey i dir menm si i ti sorti dan en fanmir kretyen, son paran pa ti bann gran pratikan me zot ti al lanmes selman pour bann gran lokazyon e li osi i ti swiv parey. Me sa zour ti en gran lafet alors i ti’n al lanmes ‘Fet Dye’ e apre sa rankont ki i ti fer avek Zezi, Aubrey i dir i ti retourn dan legliz e parey Zanfan Prodig i ti redekouver tou keksoz denouvo.

«Aparti sa moman mon ti konmans angaz mwan dan legliz dan bann diferan mouvman dan mon parwas Anse Etoile. Mon ti vin en servan dotel (ouswa Lanfandker), mon ti zwenn group zenn kot nou ti fer letid labib e ladan ti osi annan bann ansennyan e psikolog ki ti byen ankadre bann zenn e donn zot lenformasyon lo bokou size e osi bann zenn ki ti’n deza partisip dan ‘Lazournen Mondyal Lazenes’ kot zot ti’n rankontre lepap e zot ti annan bokou leksperyans pour partaze e mon ti vreman kontan akoz mon ti dekouver e aprann bokou keksoz e ti en fason pour mwan pli byen anrisi mon lekor,» Aubrey ti dir zournal Seychelles NATION.

Me ki ti reaksyon son paran?

Son papa ti pli fasil pour aksepte me son manman ti pran enpe plis letan sirtou lefe ki Aubrey i son sel zanfan e realizasyon ki i pa ti pou zanmen annan bann pti zanfan ti enpe difisil pour li aksepte sa realite konman en manman. Aubrey i dir ti pran enpe letan me apre son manman in aksepte son swa e donn li son sipor.

Sa lepok an 2005 Aubrey ti ankor en etidyan segonder me apre sa i ti kontiny son letid pos segonder A-levels kot i ti etidye Angle, Franse ek Listwar kot apre 2-an i ti kalifye pour en labours.

Me sa zenn garson ki dir o komansman i ti anvi etidye swa pour vin en avoka oubyen en ansennyan listwar me i ti sanz son lide e plito swazir pour pran en lannen sabatik pour reflesir lo son lavi ek son fitir.

«Mon lanvi pour vin en pret ti osi la e pour pran en tel desizyon ti demann bokou refleksyon. E dan sa demars mon ti ganny gide par Per Gustave Lafortune e osi enpe par Per John Gappy. Zot ti donn mwan bokou konsey. Akoz a sa moman, mwan parey nenport ki zenn mon pa ti parfe. Mon ti fer pese parey tou dimoun, me anmenmtan mon ti anvi fer sa swa pour vin en pret me a sa moman mon ti pe sibir bokou peer pressure e mon ti annan bann moman endesizyon kot mon ti santi mon ti bezwen bokou sipor ek gidans bann ki pli saz. Me malgre tou kouran, mon ti reste for e fidel dan mon langazman ki mon ti’n fer avek Bon Dye,» Aubrey i rakonte.

I dir apre en pe letan atraver kontak ki i ti’n etabli avek en mouvman pour levanzelizasyon bann zenn La Réunion ek Canada, i ti deside pour al Canada an 2010 pour sa lannen sabatik e refleksyon kot i dir i ti reste pour konmans en parkour pour li vin en lefrer.

«Mon’n reste Canada pandan 7-an dan en kongregasyon kot mon ti ganny anvoye an misyon dan plizyer pei parey La Reunion, Belgique, Pologne parmi lezot kot mon’n travay avek diferan group dimoun parey bann zenn, bann pov, e diferan group marzinalize e lezot pour anmenn parol Bon Dye kot zot. En keksoz ki mon’n dekouver dan mon parkour se ki bokou dimoun i koz avek ou an konfidans lo bokou keksoz dan zot lavi e atraver sa ou dekouver ki nou isi Sesel nou pa sitan dan mal menm si nou annan nou bann problenm sosyal, me nou bezwen admet ki bokou zenn isi Sesel i annan bokou talan e pe fer bokou bon keksoz ki souvan nou pa vwar e nou pa koz lola, » Aubrey i dir.

«Sa 7-an ti en moman kle pour ed mwan dan mon desizyon akoz konman en lefrer mon pli gran dezir se ki mon ganny anvoye pour servi dan mon pei e an 2017 mon ti fer en demann e mon ti ganny anvoye isi kot Monsenyer Denis Wiehe ti akey mwan e permet mwan fer en staz pour reentegre dan lasosyete e pour rekonnekte avek lavi dan Dyosez,» Aubrey i rakonte.

Apre nef mwan dan Dyosez, Aubrey i dir i ti reentegre e fer bokou travay evanzelizasyon atraver diferan mouvman avan ki i ti retourn La France pour kontiny son letid pour vin en pret.

«Mon pli gran lazwa se bann kontak ki mon gannyen avek diferan group dimoun e osi lazwa pour servi Bon Dye.»

Mon lazwa i profon e mon parkour in ranforsi mon konviksyon ki Zezi Kri i kontan mwan e i pou gid mwan toultan

Apre 3-an letid Aubrey in retourn Sesel pour en konze 6 semenn kot in revwar son fanmir e malgre pandemik Kovid-19, in rezouir ankor bann fason viv Kreol e apresye enpe bann pla ki i kontan.

Aubrey in dekri sa 3-an letid an France konman enn entans kot in etidye e dekouver Zezi e anmenmtan fer bann travay evanzelizasyon e osi katesis pour bann diferan group dimoun.

«Mon en dimonn ki vreman zwaye avek lakonplisman ki mon’n fer ziska prezan dan mon lavi e mon parkour in ranforsi mwan e mon konviksyon ki Zezi Kri i kontan mwan e i pou gid mwan toultan e ki i pa pou abandon mwan. Parfwa mon poz mon lekor kestyon lo ki mannyer mon pou reste toultan fidel dan sa langazman ki mon pe fer avek Bon Dye e mon fer bokou refleksyon, me mon reste konvenki ki Bon Dye pa pou abandonn mwan me i pou gid mwan dan mon lavi,» Aubrey i dir.

Pandan son letan isi Aubrey i dir in ganny sans rankontre bokou zenn dan legliz ki’n konfye li zot bann rev.

«Mon krwar ki i annan en kantite posibilite vokasyon ki bann zenn pa pe reponn pour diferan rezon parey mank bon gidans e lankadreman familyal, relizyez ek spirityel, mank formasyon spirityel konsistan, bann fanmir ki nepli atas gran lenportans avek spirityalite zot zanfan parey lontan e lezot ankor,» Aubrey in fer resorti .

Me pour bann zenn ki deza angaze dan legliz, mesaz ki Aubrey i annan pour zot se «kontinyen reste fidel e for malgre difikilte e pa bezwen per pour donn zot lavi Zezi Kri. Kontinyen fer tou pour dekouver zot lafwa e rod led bann pret e relizyez pour ed zot e gid zot, me pa zanmen abandonn zot lafwa.»

Me eski i pa’n zanmen ganny tante parey nenport zonm?

«I toutafe natirel pour en zonm santi sa latirans avek en fanm akoz nou imen nou’n ganny kree koumsa. Girlfriend mon’n annan e parey tou zonm mon annan bann lanvi ek enpilsyon e moman febles me sa ki enportan se ki letan en dimoun parey mwan in fer en swa pour donn son lavi Zezi Kri, mon bezwen konnen ki mannyer pour adres sa bann lanvi e enpilsyon e ki mannyer pour servi tou sa bann lenerzi dan en lot fason par egzanp dan bann lezot aktivite parey sport, lar e lezot aktivite e mon’n toultan kontan e pratik spor e mon’n reste fidel dan swa ki mon’n fer e Bon Dye pa’n zanmen les mwan tonbe.

«Lavi pa devret baze zis lo plezir me nou devret servi nou lespri pour reflesir e reste fidel dan swa ki nou fer,» Aubrey i dir.

Atraver en seremoni sa wikenn Aubrey i dir i ekspekte ganny aksepte konman en kandida ofisyel par Dyosez pour vin en pret.

Aubrey i ekspekte retourn Nantes, La France ver lafen sa mwan pour kontiny sa dernyen 3-an son letid e zournal Seychelles NATION i swet li bonn sans e bokou kouraz e sikse dan larestan son parkour.

Marie-Anne Lepathy