Festival Lazenes 2021   Lazenes i agrandi zot konnesans lo valer zedmo ek dikton Kreol Seselwa |18 August 2021

Kiltir i annan pouvwar pour transform en sosyete, ranforsi lakominote, forz en sans lidantite ek lapartenans pour dimoun tou laz, sirtou lazenes, kot kiltir i en veikil pour zot devlopman ek langazman sivik.

Sete sef egzekitif Lenstiti Kreol Enternasyonal, Madanm Flora Ben-David, ki ti fer sa remark pandan en seremoni pour ofisyelman lans en proze konzwent ant sa lenstiti ek Konsey Nasyonal Lazenes (SNYC) pour met an valer bann zedmo ek dikton Kreol Seselwa.

Sa proze – ‘Dekor Artistik: en levantay dikton ek zedmo Kreol Seselwa avek en eleman artistik’ – i an form bann plak, oubyen lansenny ki’n ganny enstale dan Paradis des Enfants avek bi pour promouvwar e osi konsyantiz bann zenn lo bann valer en tel leritaz.

I osi pour rekonnekte lazenes Seselwa avek nou rasin Kreol Seselwa, ek bann valer partaze, tradisyon kiltirel ek nou koutim.

Apard ki Madanm Ben-David, osi prezan kot lansman ofisyel sa levennman ki ti deroul Sanmdi  kot Paradis des Enfants e ki ti form parti bann aktivite pour konmemor Festival Lazenes 2021, ti Mer Lavil Victoria, Msye David Andre; sef egzekitif SNYC, Manmzel Penny Belmont; e osi depite sef egzekitif SNYC, Manmzel Ghislaine Belmont.

Madanm Ben-David ti eksplike ki kiltir i osi zwe en rol esansyel dan promosyon devlopman sosyo ekonomik soutenab pour zenerasyon fitir.

I ti azoute ki kiltir i osi annan sa pouvwar pour ankouraz e osi angaz lazenes Seselwa pour azir parey en pon, e akter kle pour promot lape, osi konpreansyon enter-kiltirel, ensi ki sanzman sosyal pozitiv ki pou relev, e asir byennet sosyal, e ekonomik.

«Sa dezir pour konserv nou lidantite nasyonal i devret natirel, e osi nouri nou, e donn nou serten lafyerte,» Madanm Ben-David ti azoute.

I ti osi azoute ki atraver bann tel linisyativ, bann zenn i a kapab vin sa pon ant kiltir, tradisyon e osi modernite.

Madanm Ben-David ti egalman azoute vi ki bann zenn i tre abil avek teknolozi, nou kapab pouse, e ankouraz zot pour servi sa mwayen pour anrisir nou kiltir ek nou kreolite.

I ti osi fer resorti ki en tel kolaborasyon i a permet bann zenn pour kapab re-dekouver,  promouvwar e prezerv kiltir Seselwa e anmenmtan protez sa ki nou ete, ranforsi nou sans linite ek lapartenans, e osi nou lafyerte nasyonal.

Letan i ti pran laparol, depite sef egzekitif SNYC ti dir ki sa linisyativ pa zis pour anbelir zarden zanfan, me i pou osi permet tou dimoun ki frekant sa landrwa pour re-viv, apresye, valoriz e osi ogmant zot konnesans lo nou tradisyon.

Manmzel Belmont ti eksplike ki en tel proze i osi demontre langazman bann zenn dan promouvwa, e prezerv nou kiltir Seselwa.

I ti azoute ki lanmour pour nou kiltir i a ede pour gard li solid, e osi mentenir son plas dan nou sosyete.

Manmzel Belmont ti osi demann tou zanfan, zenn e osi adilt pour sezi sa loportinite pour edik zot lekor.

I ti osi donn langazman SNYC konsernan bann linisyativ e osi kreativite bann zenn atraver bann tel aktivite artistik.

Benn portre ki akonpanny lartik i montre bann envite pe admir bann lansenny ki’n ganny enstale en pe partou dan Paradis des Enfants dan kad proze dikton ek zedmo Seselwa.

Roland Duval

Portre par Joena Meme