ANB i fer plizyer lafouy ek larestasyon pandan mwan Zilyet |05 August 2021
Bann zofisye sorti dan Biro Anti-Narkotik dan lafors Lapolis Sesel in pandan sa mwan Zilyet ki’n fek pase fer plizyer lafouy ek larestasyon.
Zot in fouy lo 1344 dimoun, dan 89 lakaz, dan 89 transpor e lo 23 bato (lapes oubyen lwazir). Sa bann lafouy in fer ki en total 85 sispe in ganny arete lo Mahé, Praslin, La Digue e bann zil pros an relasyon avek 82 ka ki Biro Anti-Narkotik (ANB) in anrezistre pour bann lofans ki relye avek en drog kontrole. ANB in osi formelman kosyonn 51 sispe pour posesyon en drog kontrole.
An rezilta sa bann lafouy ek larestasyon, ANB in arive sezi 169.32 granm zerbaz kanabis, 133.91 granm rezin kanabis, 100.01 granm kokain, 89 granm eroin e 234 plan kanabis ki ti dan posesyon sa bann sispe.
ANB i oule remersye zabitan Persévérance, Corgat Estate, Plaisance ek Chetty Flat Estate dan distrik Anse Aux Pins pour zot sipor atraver lobzervasyon ouswa lenformasyon ki zot in partaz avek ANB, sirtou pour bann sipor ki zot in aport son bann zofisye pandan zot bann loperasyon.
Manm piblik pe alor ganny demande e ankouraze pour kontinyen servi laliny telefonn 133 pour transmet zot lobzervasyon ouswa lenformasyon konfidansyel kont aktivite drog kontrole oubyen bann lezot akt kriminel ki pe pase dan zot kominote.
Kominike ANB