Lanterman deta ansyen Prezidan James Mancham ozordi |12 January 2017
En zournen dey nasyonal
Sesel ozordi pe onor en zournen dey nasyonal an siny respe pour defen ansyen Prezidan Mancham ki son lanterman pou fer ozordi apremidi.
Msye Mancham ti mor trankilman kot son lakour Glacis Sur Mer Dimans granmaten a laz 77-an.
Antretan sef servis protokoler dan biro Prezidan, Madanm Jacqueline Moustache- Belle, in donn plis detay pour manm piblik ki ti a swete rann zot dernyen omaz Msye Mancham e osi asiste servis fineray dan Katedral Imakile Konsepsyon.
Madanm Moustache-Belle in dir ki laranzman avek servis bato Cat Cocos in fini fer pour bann dimoun La Digue ek Praslin ki pe vin Mahé pour asiste servis kot lekor ansyen Prezidan Mancham pou ekspoze Palais des Sports e osi lanterman Katedral Imakile Konsepsyon.
Dapre bann dernyen lenformasyon ki Madanm Moustache-Belle ti donnen yer apremidi, bato pou kit lasose Praslin 9er bomaten ozordi apre ki i pou’n pran bann dimoun La Digue 7.30 bomaten.
Sa servis bato i gratwit me dimoun ki pe vin asiste lanterman zot bezwen anmenn zot rafresisman ek dezennen.
Ler zot ariv Mahé pou annan bis ki pou pran zot lasose e anmenn zot kot lekor pe ekspoze Palais des Sports kot pou annan kantik avek lapriyer dirize par Dyak Louis Agathine apartir 9er bomaten.
Bann dimoun Mahé zot kapab al direk Palais des Sports e pour bann ki dan sant lavil pou annan en servis bis ki pou pran dimoun kot Patform B lo stenn.
Midi lekor Msye Mancham pou kit Palais de Sports pour al State House kot laba i pou ekspoze pour manm son fanmir, zanmi ek lezot VIP rann zot dernyen omaz avan ki sa kortez fineb i kit State House 1.45 apremidi pour desann katedral pour seremoni lanterman kot tou dimoun ki anvi i kapab partisipe.
“Tou dimoun i kapab rod en plas dan katedral parey nenport lanterman me selman pou annan plis plas ki pou’n rezerve pour bann digniter, lafanmir, zanmi pros Msye Mancham,” Madanm Moustache-Belle in eksplike.
Anplis ki sa pou annan aprepre 250 plas ki’n fer andeor katedral pour manm piblik ki oule asiste lanterman e pou annan en lekran ki’n enstale deor pour zot kapab swiv tou bann deroulman anndan.
Madanm Moustache-Belle pe demann tou dimoun ki pe retourn Praslin ek La Digue pour toudswit apre seremoni dan katedral al lo Platform B lo stenn bis pour pran bis pour al lasose kot bato pe espere pour retourn avek zot kot zot.
Kortez lanterman li i pou kit katedral e pas par Lari de Palmes, en parti Laveni 5 Zen e an arivan kot Moniman Bisantener i mont Laveni Lendepandans pour al State House kot Msye Mancham pou antere.
Madanm Moustache-Belle i dir dimoun i annan permisyon pour debout toudilon sa bann larout si zot anvi regard kortez pase e menm anvoy fler parey aletranze i fer.
Lo kote fler i dir dimoun ki anvi donn fler pour lanterman zot kapab kit kot baro State House apre leneseser ava ganny fer pour met lo latonb.
An sa ki konsern liv pour seremoni lanterman, Madanm Moustache-Belle i dir pou annan liv ki pou donnen kot Palais des Sports pour seremoni laba apre pou annan en lot liv kot katedral pour lanterman.
Madanm Moustache-Belle in ankor fer rapel ki Msye Mancham ti en dimoun tre popiler e tou dimoun i ganny envite pour asiste seremoni kot son lekor pe ekspoze e osi servis fineray kot katedral. Par kont, seremoni lanterman State House pou enn prive.
“Tou dimoun i ganny envite e tou mwayen posib in fer pou akomod otan dimoun ki oule asiste servis fineray e bann ki pa kapab vini zot touzour kapab asiste sa seremoni an direk lo radyo ek televizyon SBC,” Madanm Moustache-Belle i dir.