Lanmor Premye Prezidan Sesel, Msye James Mancham |10 January 2017

Seselwa i eksprim diferan lemosyon ek reaksyon

Swivan lanmor premye Prezidan Sesel, Msye James Mancham, ki ti arive Dimans granmaten, in annan diferan lemosyon ek reaksyon parmi lapopilasyon.

Si bann dimoun pli aze in eksprim bann santiman tel ki ladmirasyon pour Msye Mancham, bann zenn parkont pa tro vreman konnen lekel sa zonm ki’n mark nou listwar.

En madanm aze ki reste Machabée ti dir ki menm si i konnen ki Msye Mancham ti en bon laz e ti’n ariv son letan, i ti soke letan i ti tann lanons son lanmor.

“Mon ti aflize ler mon ti tann son lanmor. Mon ser ti pli sagren vi ki nou’n grandi Glacis e nou konn son fanmiy depi lontan. Ansyen Prezidan Mancham in travay byen e dir pour son pei alor la i pran en repo byen merite,” i ti dir.

Sa madanm in eksprim kondoleans pour lafanmir Mancham.

Albino Serra i dir i pa konn Msye Mancham tro byen me dapre listwar e sa ki’n ganny rakonte, Msye Mancham in fer en travay formidab dan nou pti pei.

“Li ki o konmansman devlopman Sesel i ti sa Prezidan ki’n fer avanse keksoz e mon annan gran respe pour li.”  

Msye Serra ti osi pran loportinite pour remersye Msye Mancham pour son devouman.

En zenn-onm 23-an ki osi en zabitan Glacis ti dir ki menm si son papa i fanmir ase pros avek Msye Mancham, i pa ti konn li personnelman.

“Mon respe li dapre sa personalite ki mon tande i ti annan me alafen dizour tou dimoun i mor e ti’n ariv son letan,” i ti dir.

Josette ki reste Foret Noire ti dir ki i ti ankor zenn pandan letan lendepandans e i pa tro konnen ki ti deroule.

“Dapre mon konpran, letan i ti retourn Sesel in fer en kantite. Mon ekout lopinyon lezot me mon pa en fanatik,” i ti dir.

En lot zenn aze 22-an ki sorti Hermitage ti dir ki i ti aprann lo sa lanmor atraver son fanmir..

“Ti en move nouvel pour mwan tande ki premye Prezidan in mor,” i ti dir.

En lot msye sorti Hermitage Jimmy Marie ti dir, “I ti en gran personaz dan devlopman Sesel malgre son letan opouvwar ti kourt. Depi son retour in fer revolisyon e bokou ti menm kwar i kapab repran pei.”

En madanm aze 70-an ki reste Belvedere ti dir ki i ti ganny en sirpriz ler enn son vwazen ti donn li sa move nouvel.

“Mon ti sezi akoz sa pa en keksoz ki mon ti ekspekte vi ki dan nouvel mon tann bann diferan proze ki i ti pe vin avek e apre en sel kou in mor,” i ti dir.

I rapel Msye Mancham ankor zenn letan ki son papa ti annan laboutik.

“I ti al fer son letid avoka deor e letan i ti retournen i ti ouver Parti Demokratik. I pa ti en move dimoun, i ti toultan amikal e koz avek tou dimoun. Ou ti menm kapab war li dan bazar Sanmdi bomaten pare pour ed lezot si ou mwayen pa ti permet,” i ti dir.

Sa madanm ti osi rapel letan ki i ti rankontre Msye Mancham letan ki i ti travay Desroches.

“I ti dalon avek mon bourzwa e letan mon ti fer zot lasanm, Msye Mancham ek son madanm ti koz ek mwan,” i ti dir.

En zabitan Beau Vallon aze 62-an ti dir ki lanmor Msye Mancham i annan en gran lenpak e ki Msye Mancham ti en politisyen “pasifik e ouver”.

“In fer sanzman pour fer Sesel sorti anba kolonyal pour ganny lendepandans e sa traze ki i ti ankor pe fer mon pa ti ekspekte li pour mor sitan vit,” i ti dir.

En lot zonm aze 77-an sorti Les Mamelles ti dir ki Msye Mancham ti en bon zanmi pour li vi ki zot ti grandi ansanm.

“In vin konman en sok pour mwan letan mon fiy ti anons mwan sa nouvel, me i’n fer en gran travay e i pa ti en zonm fyer, i ti toultan annan en bon leker, kontan koze e kontan partaze,” i ti dir.

Jerrick Ernesta ti dir ki i ti’n deza tande ki premye Prezidan ti annan problenm medikal alor pa ti vin konman en sok letan ki i ti antann sa nouvel.

“Mon’n toultan kontan son fason fer akoz i ti kwar dan lademokrasi e pour mwan i pli bon prezidan dan sa kat ki Sesel in annan,” i ti dir.

En msye Sans Souci aze 38-an ti dir ki letan i ganny laz konnesans ansyen Prezidan Mancham ti’n fini fer son bout me par sans son manman ti en travayer domestik pour sa patriot.

“Lenpresyon ki mon gannyen avek mon manman se ki i ti en bon zonm, ti fasil pour travay avek li e mon regard li konman pli meyer Prezidan ki nou’n annan; malerezman i pa’n ganny ase letan pour travay. Mon vwar i fer lapenn ki sa pli meyer dimoun in ganny ranverse e pa’n ganny sans delivre parey i ti sipoze,” i ti dir.

Sa msye ti dir i kwar ki Msye Mancham i enn bann Seselwa ki ganny pli rekonnet dan lemonn.

“Apre tou sa ki i’n sibir i’n annan en leker lape e pardonnen, en leker parey pour Mandela e avek en leker koumsa baro paradi pou ouver pour li,” i ti dir.