En remersiman spesyal pour manm SPDF ek zot fanmiy |06 January 2017
Prezidan Danny Faure, ki osi Konmandan-an-Sef Lafors Defans Pep Sesel (SPDF), in anmenn en remersiman spesyal sorti kot pep Seselwa pour tou bann zonm ek fanm dan SPDF.
I ti fer sa yer pandan son premye rankont avek bann zofisye SPDF. Sa rankont ti deroul kot baz Lakademi Ladefans Sesel Ile Perseverance e parmi bann prezan ti sef lafors defans Brigadye Leopold Payet, sef deta mazor Kolonnel Michael Rosette, manm konsey ladefans, plizyer o zofisye militer ek lezot zofisye sorti dan diferan departman sa lafors.
“Se avek gran admirasyon ki mwan mon annan pour bann zonm ek fanm ki dan SPDF, admirasyon pour sa sakrifis, admirasyon pour sa devosyon e admirasyon pour zot travay dir,” i ti dir.
I ti dir ki SPDF, ki pe selebre 40-an sa lannen, ti ganny etabli anliny avek lartik 162 Konstitisyon e son bann fonksyon i kler e i reflekte lartik 163 nou Konstitisyon.
“Bokou in sanze anmezir ki SPDF in evolye, nouvo dinamik dan larezyon, dan lemonn e nouvo devlopman sosyo-ekonomik Sesel,” i ti dir.
I ti dir ki moman in arive pour fer refleksyon pour regarde ki mannyer nou kapab fer pli byen dan sa 10-an ki devan nou an regardan bann defi, febles, pwen for e analiz striktir sa lorganizasyon pour fer ki SPDF i kontinyen zwe son rol pour li defann larepiblik Sesel ek pep Seselwa.
“Mon pou donn mon letan baze lo leksperyans ki mon annan dan gouvernman pour mwan travay avek zot pour fer sa bann sanzman ansanm avek bi pour nou konsolid nou striktir e ki lafors defans i vin en lorganizasyon pli efikas, pli performan e pli profesyonnel,” i ti dir.
I ti fer resorti ki i bezwen annan bokou plis lespas pour bann zenn annan en karyer ki permet zot avanse.
Prezidan Faure ti osi remersye fanmiy ki soutenir bann zofisye ki pe osi fer bokou sakrifis.
“Ki sa lannen i en lannen linite, sa lannen i reste en lannen lape e ki sa lannen i kontinyen reste en lannen stabilite,” i ti dir.
Brigadye Payet ti sezi lokazyon pour ofer gratitid avek tou Seselwa pour sipor pandan lannen e ankor enn fwa reafirm langazman lo zot serman pour reste touzour determinen, lwayal e senser anver Konstitisyon e pour defann nou patri.
“San zot sipor, i ti pou difisil pour akonpli tou sa bann latas e fer fas avek bann defi 2016,” i ti dir.
I ti dir ki lannen 2016 ti en lannen ase sarze pour SPDF e malgre defi sa pa’n anpes zot akonpli bann progranm ek misyon ki ti’n ganny progranmen.
“Nou bann zefor ek plan pour moderniz nou lafors pe kontinyen, e an 2016 nou’n fransir plizyer letap dan sa direksyon,” i ti dir.
Bann lakonplisman i enkli en nouvo sistenm ‘Video Downlink’ ki donn zimaz ‘realtime’ ki ganny filmen par avyon sirveyans, legzersis ‘Cateau Noire 2016’ e plis lozman pour solda parmi lezot.
“An 2017 nou pou kontinyen met lanfaz lo formasyon nou bann zofisye ek lezot ran[...]SPDF pou kontinyen met ankor plis zefor pour ranforsi moral, konfor ek byennet son bann zonm ek fanm dan liniform[…] Devlopman moral, sivik, ensi ki spirityel pou osi reste en priyorite pour asire ki zot reste bann sitwayen responsab e akonpli dan tou laspe lavi,” i ti dir.
I ti dir ki lafen sa mwan, lafors i ekspekte al Moris pour pran par dan legzersis ‘Cutlass Express 2017’ ki en legzersis milti-lateral organize par lafors Ameriken e nou ekspekte war retour ‘Topaz’ apre en gran peryod reparasyon dan Lenn.
I ti osi felisit tou manm lafors defans ek lezot staf sivil dan son lorganizasyon pour zot travay an 2016.
Pandan sa seremoni, ti annan plizyer lapwentman ek promosyon pour bann zofisye sa lafors.
Pour konklir sa vizit, Prezidan Faure, akonpannyen par de zofisye (en madanm ek en msye), ti ganny loner pour koup en gato fer espesyalman pour sa lokazyon.
