Mesaz Nwel Prezidan Danny Faure |24 December 2016

‘Annou fer en pti diferans dan lavi en lot ki dan bezwen’

« Si nou kapab fer en pti diferans dan lavi en lot ki dan bezwen, mon asire ki sa Lafet Nwel pou annan plis sans, plis valer, pou anmenn plis lazwa dan nou leker, e plis lanmour dan nou lavi. »

Sa i sorti dan mesaz Prezidan Danny Faure pour lokazyon Lafet Nwel ki tonm demen.

Teks entegral mesaz Prezidan Faure i lir koumsa :

« Lafet Nwel in arive ankor enn fwa, avek tou sa ki i reprezante pour nou konman kretyen. Sa lafet i fer nou rapel tou sa ki bon pour limanite, bann valer fondamantal tel ki lanmour, lape, linite, fraternite, konpasyon ek bonn volonte. Se sa mesaz ki’n ganny transmet okour plis ki 2000 an ki nou pe selebre sa lafet, ki mark nesans Zezi Kri.

« Dan nou pei, nou viv sa bann valer. Se sa ki fer nou sa pep armonye, ki viv anpe avek divers kiltir, ras ek larelizyon; en pep ki sansib anver santiman ek bezwen lezot, en pep ki annan leker ek lebra ouver.

« Zistwar Nwel i donn nou sa gidans lo ki mannyer nou kapab kontinyen lo sa semen e annan lespwar dan en lavenir briyan e prosper. I donn nou sa kouraz pour fer fas avek nou bann defi, sirmont bann lobstak e fer nou viv pli pros konman frer ek ser.

« Sa lannen nou pei in pas atraver bokou levennman ki’n mark sakenn de nou dan fason diferan. I annan ki’n eksperyans bokou difikilte tandiski lezot in war li konman en lannen loportinite. Me sa ki pli enportan se sa ki sakenn de nou in kapab tire konman en leson ki pou enspir nou, ki donn nou lespwar pour sa lavenir ki nou pe esey kree ansanm pour nou zanfan. Nou swete demen ki nou bann zanfan i annan sa menm lespri Nwel, ki zot kapab enterpret li dan en fason ki ava fer zot viv bann menm valer ki pou fer zot vin en pep pli fraternel, pli ini e ki annan plis konpasyon.

« Pandan sa peryod festivite, mon swete ki nou zwenn avek lemonn pour nou selebre Nwel ansanm, me ki nou osi ranforsi nou zefor pour pli byen viv sa lespri Nwel. Annou pran en pti moman, parmi bann selebrasyon pour nou reflesir dan ki fason nou kapab met nou a dispozisyon lezot dan nou fanmir, dan nou landrwa travay, dan nou kominote e dan nou pei. Dan nou refleksyon, annou mazin bann zanfan ki pa pe pas Nwel dan en fanmiy; bann dimoun aze ki pe viv zot tousel, dan lasolitid, bann malad ki pe debat avek zot soufrans; bann ki’n perdi en manm zot fanmir e pe viv dan sagren; bann ki pe pas sa lafet dan prizon, lwen avek zot fanmir; bann ki pe fer fas avek sitiasyon sosyal byen difisil; nou bann frer ek ser ki’n vin viktim fleo drog ek lalkol e manm zot fanmir ki pe soufer. Annou reflesir ki mannyer sakenn de nou i kapab etann en lanmen pour ofer zot lanmour, rekonfor, soulazman ek lafors pour kontinyen.

« I pa kout bokou pour rann en pti vizit, pour pas en pti moman ansanm, pour anvoy en pti swe, pour partaz sa lafet avek zot e fer en nenport pti zes pour montre ki nou annan en leker pour lezot. Fodre pa ki nou bliye ki lafason ki nou tret sa ki pli feb, sa ki pli vilnerab, se sa ki pli gran tes pour nou konman en nasyon. Si nou kapab fer en pti diferans dan lavi en lot ki dan bezwen, mon asire ki sa Lafet Nwel pou annan plis sans, plis valer, pou anmenn plis lazwa dan nou leker, e plis lanmour dan nou lavi.

« Pandan sa Lafet Nwel i osi en letan pour nou montre rekonnesans e dir mersi pour tou bann byenfe. Dan sa lespri lanmour ek fraternite, nou eksprim nou lapresiasyon ek remersiman pour nou bann frer ek ser ki pe travay dan bann servis esansyel, bann manm servis militer ek lapolis, bann profesyonnel ek travayer lasante e lezot ankor, ki bezwen travay lizour konman aswar pour donn swen e asire ki nou pei i kontinyen fonksyonn dan lord, lape ek sekirite.

« Mon swe pour tou Seselwa se ki zot selebre en bon Lafet Nwel me osi met an valer sa lespri lapartaz, lanmour ek linite ki mon konsider konman pli gran e ki depas nenport ki diferans ki kapab annan antre nou konman en pti nasyon.

« Mon pran sa loportinite pour mwan remersye tou dimoun – pour zot devouman e travay dir pandan sa lannen pour asire ki nou pti pei i kontinyen briye. Ki Bondye i kontinyen vers son benediksyon lo nou pei Sesel.

« Mon swet tou Seselwa en Lafet Nwel ranpli avek lape ek lanmour. »