Lanmizik: Paster Gordon i ofer ou en kado Nwel |23 December 2016
Paster Gordon Robert in dekri son premye albonm konman en kado Bondye.
Sa i dir se akoz Bondye ki’n montre li zwe lanmizik e donn li lenspirasyon pour konpoz sa bann zoli lanmizik e sant sa bann zoli sanson.
Se pour sela osi ki i’n swazir sa tit : ‘Mon pa pou arete loue’.
Me sa albonm ki ti lanse Zedi kot Legliz Lapannkot Mont Fleuri i osi ariv konman en zoli kado Nwel pour nou tou.
Sa 13 sanson gospel poetik avek zot lanmizik ritme e varye i ofer ou en lokazyon inik pour detann dan en latmosfer lape e anmenmtan lazwa. I osi permet ou resours ou dan parol Bon Dye.
Pandan sa letan festivite e osi refleksyon, i reprezant en kado ideal pour ofer lezot. Akoz avek sa bann sanson, ou kapab zisteman reflesir, priye, loue, sante e menm danse.
Lo kote mizikal, sa zoli travay i inovatif dan limenm. Sa i akoz Paster Gordon i sorti dan tradisyon lanmizik pirman gospel, pour li ofer nou en varyasyon diferan stil lanmizik. Sa i al depi balad ziska moutya, an pasan par rege ek sega.
Konmsi mesaz sa paster i ki tou fason i bon pour priye.
An plis, Paster Gordon pa’n kontant li avek son zoli lavwa e son fen son gitar klasik ki melanz avek ritm modern pour kre en lanbyans mizikal ekstraordiner e agreab : Dan en senbol linite lafanmiy, in azout lavwa son madanm Janette e son fiy Alahna. Sa de lavwa feminen i anmenn en divinite ekstra ki petet zis en lavwa maskilen pa ti pou kapab kree.
Paster Gordon i dir nou ki in konpoz serten sanson ki lo sa albonm depi plis ki 30-an pase. Serten parey ‘Laglwar nou donn Zezi’ ti’n deza vin popiler dan bann rasanbleman relizye. Me petet zot pa ti pou’n vin osi zoli parey lo sa albonm si Paster limenm ti’n sant zot avan.
Felisitasyon i osi al pour son bann mizisyen – Cyril Vital, Nabby Jules ek Peter Jules.
Antretan, nou a pran pasyans pour esper prosen albonm Paster Gordon. I dir nou ki i deza annan ase sanson pour sa. Me anmenmtan, nou konnen ki i en perfeksyonis ki pran son letan. Apre tou, si nou’n esper 30-an pour en si zoli travay, nou kapab esper ankor en pe letan pour en lot ankor pli byen.
M.S.