Gouvernman i kontiny konsiltasyon avek lopozisyon • Tou le de kote i eksprim satisfaksyon |03 December 2016

Konman laswit konsiltasyon ki Prezidan Danny Faure in konmanse avek lopozisyon, i ti yer bomaten rankontre en delegasyon parti LDS (Linyon Demokratik Seselwa) State House.

Sa ti trwazyenm rankont ant legzekitif ek lopozisyon ki an se moman annan mazorite dan Lasanble Nasyonal, depi ki Prezidan Faure ti ranplas ansyen Prezidan James Michel le 16 Oktob sa lannen.

Apre sa rankont, ki ti dir anviron 4 erdtan edmi, tou le de kote ti eksprim satisfaksyon lo fason ki sa bann diskisyon pe ale.

Lider LDS Roger Mancienne ti dekri diskisyon konman « serye e fran ». Sa ti menm si i ti avoue ki i annan « serten size difisil ki demann reoriantasyon gouvernman avek en lot filosofi ».

Delegasyon LDS ti’n osi konpri sef lopozisyon dan Lasanble Wavel Ramkalawan, depite sekreter zeneral LDS Simone De Commarmond, manm Lasanble pour distrik Anse Etoile Ahmed Afif e osi Msye Roy Fonseka.

Msye Mancienne ti dir ki zot in repas lo serten pwen ki ti lo azanda e osi rod rezilta pour lezot. Rezilta, i ti azoute, in vin dan laform nouvo lalwa laliberte Lenformasyon ek Lalwa lo Drwa Imen ki pe ganny propoze. Draft sa de proze de lwa pe ganny soumet avek LDS pour ki i annan konsiltasyon piblik avan ki zot al devan Lasanble. En lot size ki le de kote in tonm dakor lo la se ki gouvernman i donn sak manm Lasanble Nasyonal ki ganny elekte en biro dan son distrik.

Vis-Prezidan Vincent Meriton, ki osi responsab pour Kominikasyon, ti lo kote gouvernman deklare ki miting ti’n « prodiktif ».

I ti azoute ki azanda i ganny gide par sa trwa prensip ki Prezidan Faure pe met lanfaz lo la ; bon gouvernans, transparans ek responsabilite.

Parmi bann lezot size ki le de kote ti diskite yer ti konman retir politik dan striktir distrik kot travay Manm Lasanble (MNA) i osi devret separe avek sa ki pour Ladministrater Distrik (DA), ki CSR (Corporate Social Responsibility) i finans bann sekter ki pli dan bezwen, lapwentman en nouvo Mer pour lavil Victoria ki a ganny rekonmande par Lasosiasyon bann Distrik Victoria (ADV) e rediksyon pri lavi atraver STC (Seychelles Trading Company).

Lo sa dernyen size, gouvernman in dir ki menm si pri 14 komodite de baz pa’n monte, i bezwen vwar konman pour mentenir zot pri e anmenmtan fer desann pri lezot komodite avek bi fer desann pri lavi. Sa i dir malgre sanzman ki kapab annan dan to lesanz.

Ti osi annan en nouvo pwen ki ti leve dan miting yer. Sa kot delegasyon LDS in demann Prezidan Faure pour sispann de minis dan gouvernman. Enn akoz i annan spekilasyon ki in resevwar larzan avek en biznesmenn Nepale an koneksyon avek rekritman Gurka sorti dan sa pei. LDS in dir ki sa ka i tre grav e ki zot pe anmenn li devan Komisyon Anti-koripsyon.  Lot demann pour sispann en lot minis i swivan alegasyon ki i kapab enplike dan en zafer trafik drog lo Praslin.

Vis-Prezidan Meriton in reasir ki Prezidan a donn son desizyon lo sa de size enn fwa ki tou prosedir in ganny swiv.