Premye group ners etranze in zwenn servis Minister Lasante |01 July 2016

En premye group 7 ners etranze  dan 15 ki ekspekte zwenn diferan servis spesyalize dan Minister Lasante in konmans travay depi Lendi.

Larestan 8 lezot i ekspekte konmans travay zot osi dan bann zour ki pe vini.

Minis pour Lasante Mitcy Larue ti dir resaman ki son minister in bezwen rekrit sa bann ners pour zot vin konble sa mankman ners sirtou dan bann domenn spesyalize  parey dan lasal loperasyon ek ICU.

“Nou’n met lavertisman  e nou’n  fer tou sa ki nou kapab. Nou’n ganny ennde ners ki’n retournen e ganny anploye e i annan ennde ankor ki pe al ganny anploye. Me nou bezwen ankor ners e nou napa swa. Nou’n tenir en kantite letan avan deside pour anmenn ners etranze,” Minis Larue ti eksplike.

I ti dir ki bann ners ki la zot toultan pe dir zot fatige e pe travay anba bokou presyon e ki menm si ou pou donn zot plis larzan, lafatig i la akoz zot pe travay plis e servis in ogmante. 

“Alors nou’n trouv li neseser pour anmenn ners etranze,” Minis Larue ti eksplike.

Minis Larue i dir sa bann ners pou isi pour en peryod letan kot apre si nou ganny ase ners ki formen atraver lenstiti formasyon ners, sa bann etranze ava retourn dan zot pei.

“Me pour lemoman nou napa swa si nou anvi vreman amelyor kalite servis ki nou pe donn nou popilasyon,” Minis Larue ti eksplike.

I ti azoute ki son minister pe fer sir ki sa bann ners zot koz byen Angle pour anpes baryer kominikasyon avek pasyan.

Me Minis Larue in ensiste ki sa bann ners pa pou al dan kominote me lo ward e dan bann landrwa ki’n mansyonnen avan.

Me akoz menm si lenstiti formasyon ners i kontinyen donn formasyon ners, e in annan plizyer demars pour fer bann ners retournen akoz nou pa pe ganny ase ners e akoz zot pa pe reste dan sa profesyon?

Minis Larue ti fer remarke ki i annan ners ek lezot travayer lasante ki reste pour en kantite lannen me i ti azoute ki lontan ners ti reste plis dan Minister Lasante akoz ti napa servis lasante prive.

“Ozordi i annan en kantite klinik prive ki’n ouver e kote zot vin pran ners? Se kot nou e menm lotel ozordi i anploy ners e tousala i sorti kot nou menm akoz dimoun i lib e zot al dan lezot landrwa pour diferan rezon parey difikilte pour zot travay night shift,” Minis Larue ti eksplike.

I ti fer resorti ki mank ners dan servis lasante i en fenomenn ki pa afekte zis Sesel e ki en komite in ganny met anplas pour get dan sitiasyon ners dan son totalite.