‘Ti en moman lespwar pour lavenir, mon paran ti rakont mwan’ |28 June 2016

Lyanne Aristide, en zofisye kot Konsey Nasyonal Lazenes ki ozordi i dan son 20enn lannen, pa ti ankor ne zour lendepandans me son paran in toultan rakont li ki mannyer lavi ti ete sa lepok avan lendepandans.

“Zot ti toultan koz lo sa zour swar le 29 Zen 1976 avek bokou lemosyon e leksitasyon. Pour zot sa ti en moman lensertitid me osi en moman plen avek lespwar pour en lavenir meyer.”

“40-an apre mon mazinen desizyon pour swazir lendepandans, baze lo tou sa ki mon’n tande, lir e swiv lo televizyon mon krwar ti en bon semen akoz in permet Sesel fer gran pa dan son devlopman ekonomik. An rezilta sa nou’n vwar bann nouvo lenfrastriktir parey semen, lakaz, batiman piblik ki’n ganny konstrir, servis pour piblik in ganny met an plas okour bann lannen e anmezir plis devlopman i arive keksoz in modernize e teknolozi in rantre. Nou pei in menm vin sanpyon dan konservasyon son lanvironnman. Bokou progre lendepandans in anmennen menm si malerezman in osi anmenn degradasyon dan valer spirityel ek moral parmi nou pep.”