‘Nou ti kontan Sesel ti’n vin endepandan’ |28 June 2016

“Zour lendepandans le 29 Zen 1976 ti annan en latmosfer lafet dan pei e akoz ti’n annan bokou preparasyon parey miting pour donn dimoun lenformasyon lo sa ki ti pe arrive, alor zot ti kontan ki Sesel i ganny son lendepandans,” Donald  Celestine, en zofisye servis piblik ki ozordi in pran son retret, i eksplike.

“Ler bann koze lo politik ti konmanse mon rapel ti annan bokou rasanbleman kot dimoun ti ganny envite pour vin ekoute me tou ti vin pli so an 1964 ler parti SPUP ti formen. Mon ti annan 16-an sa lepok e mon ti kontan al ekout bann miting nenport landrwa ki ti fer e partisip dan bann aktivite. Mon ti pe ganny bokou leformasyon lo nou sitiasyon konman en pep e sa ti ed mwan konpran pli byen sa ki ti pe arive.”

“Mon ti annan 28-an e mon ti la parmi lafoul letan sa seremoni ti pe deroule. Ti annan korvet dan por e dimoun sorti dan tou kwen pei ti pe sirkile anvil. Me pour mwan menm si en lot paviyon ti ranplas Union Jack, ti napa okenn sanzman. Kouler paviyon ti reste parey zis laform ki ti’n sanze e osi tou bann gro pozisyon dan pei ti kontinyen reste avek bann etranze. Ti napa okenn gran sanzman dan lavi bann Seselwa ordiner.”

Me Msye Celestine, ki ozordi i aze 68-an e pe zouir son retret, i dir lendepandans ti meyer semen pour Sesel.