Sa ki ti la i rapel … sa ki’n antann koz lo la i reflesir |28 June 2016

40-an lendepandans demen e bokou dimoun i rapel ler zot ti desann anvil sorti dan kat kwen Mahé dan bann kanmiyon ki zot ti frete par group ou par fanmir.

Ti en gran levennman sa zour 40-an pase pour sa pti Sesel ki son popilasyon ti anviron 60 mil sa lepok. Ki son popilasyon ti ankor plizoumwen dan linyorans, dan mizer e anba dominasyon kolonyal.

Bokou i ankor rapel, bokou pa ti ankor ne me ozordi lavey 40enm lanniverser sa lendepandans serten i partaz zot santiman…

‘Ti en moman pour selebre menm si nou pa ti tro asire ki pou arive apre’

Aze dan son 20enn lannen sa lepok Madanm Cecilia Adrienne ki ti reste Cascade i rapel sa zour i ti desann anvil akonpannyen par son tantin.

“Mon rapel ler i dir ou 4er apremidi nou ti’n fini ariv anvil. Ti vreman en moman eksitan, tou dimoun ti sant Belmanman met ou gro zip desann pour lendepandans e ti vreman gou menm si nou pa ti tro asire ki mannyer keksoz pou deroule apre tou sa selebrasyon.”

“Ti annan dimoun partou anvil me selman sa lepok ti napa sa kantite zoli lalimyer parey konmela. Ti annan laklerte zis dan zanmerant kot seremoni ti deroule. Dimoun bokou ti plere avek lemosyon me mwan ki mon paran ti koz bokou lo zot lavi anba sistenm kolonyal mon ti toultan kwar ki avek lendepandans keksoz pou sanze. Sa zour mon pa ti ni sagren ni zwaye akoz personn pa ti konnen ki pou al arive apre. Nou ti’n antann bokou ki sa de dirizan politik sa lepok ti pe dir. Msye Albert Rene ti eksplik pour li e Msye James Mancham ti dir sa ki pour li e sa ti met bokou dout dan nou lespri. Me selman mon ti kontan akoz mon ti annan lespwar ki nou pou pli byen. Me bokou dimoun ti trakase pour lavenir sirtou bann dimoun ordiner.

“Me ozordi mon kontan akoz lendepandans in anmenn bokou bon keksoz, pei in fer bokou progre e kondisyon sosyal dimoun in amelyor en kantite.”