Sesyon Lasanble Nasyonal - Bann pti kontrakter pou ganny en logmantasyon plitar sa lannen |27 May 2016

Bann pti kontrakter ki annan kontra avek Lazans pour Lanbelisman ek Zesyon Salte pou ganny en logmantasyon plitar sa lannen pour zot kapab pey zot travayer ki lo saler minimonm dapre lalwa.

Minis pour Finans, Komers ek Lekonomi Ble Jean-Paul Adam ti dir sa dan Lasanble Nasyonal sa semenn letan i ti pe reponn enn bann kestyon dirzans.

Minis ti dir ki i pe pran en pe letan pour son minister fini kapab ranmas tou lenformasyon lo sa bann pti kontrakter ki annan kontra avek Lazans pour Lanbelisman ek Zesyon Salte.

I ti eksplike ki de ki sa travay ranmas lenformasyon i terminen, bann pti kontrakter pou ganny zot logmantasyon e sa dapre lalwa logmantasyon dan saler minimonm ki ti vin an viger an Avril 2016.

Swivan demann serten manm dan Lasanble Nasyonal, Minis Adam ti osi dir ki son minister pou get dan posibilite fer en lodit zeneral lo Lazans pour Lanbelisman ek Zesyon Salte vi ki i ganny en bidze anyel plis ki 151 milyon roupi.