Hudson Dorothe i lans ‘Toultan’ |28 April 2016

Santer popiler Hudson Dorothe fek lans en nouvo albonm avek tit ‘Toultan’ lo marse.

Sa nouvo konpilasyon 11 sanson i enkli lanmizik sega, rege ek zouk.

Msye Dorothe in dir ki sa bann sanson i baze lo sa ki nou vwar toultan e sa ki nou tande toultan, parey tit sa albonm i dir.

«Mesaz i la li me mon pa kapab eksplike. Fodre ekoute pour zot konpran,» i ti dir.

Pour son bann fans i ti dir ki parey son labitid, i pe donn zot bann parol en pe rar, 3-an apre son dernyen CD ki ti annan pour tit ‘Mon koko’.

«Vi ki mon an retar pour zot, mon’n fer mon mye pour mwan sonn zot zorey avek enn de pti parol en pe rar,» sa artis in dir.

In osi demann zot pour kontinyen siport li e aste son nouvo albonm e met li dan zot koleksyon.

Sa albonm ki kout selman 125 roupi i avant kot Ray’s Music Room, Kot Do e avek Msye Dorothe limenm.

I pe osi ofer en promosyon spesyal kot pour 150 roupi ou kapab ganny sa nouvo albonm ek albonm ‘Mon Koko’ ki i ti lanse an 2013.

R. H.