Follow us on:

Facebook Twitter LinkedIn YouTube

Archive -Entertainment

Nigel Henri: Legzanp artis ki ed artis |13 February 2016

Tro souvan, bann artis i depan tro lo gouvernman ou Konsey Nasyonal pour Lar (Nac) pour rezourd zot problenm ou pour ed zot devlope.

Me bann artis i osi kapab pran linisyativ pour ed zot lekor e fer zot lar avanse.

Konman en artis profesyonnel depi en bon pe letan e ki’n fer bokou sikse lokalman osi byen ki aletranze atraver lavant son bann tablo, pent Nigel Henri i en bon legzanp en artis ki kapab debout lo son prop lipye. Resaman, Nigel in kre en pti biznes ki pou non selman permet mye soutenir li ekonomikman, me pou osi en gran led pour son bann koleg artis.

Sa se ‘The Palette’, son laboutik ki in ouver dan batiman ‘Carrefour des Arts’. Si bann artis in souvan konplent en mank materyo lokalman pour permet zot fer zot travay, Nigel in sirman anmenn solisyon pour zot : En gran varyete materyo ek akseswar ki neseser pour penn i disponib dan son laboutik.

Nigel i dir nou ki i annan an tou 245 diferan aytenm. Sa i konpri kannvas, palet, penso, kouto, papye, verni, marker, kreyon kouler, lapentir akrilik, delo ek delwil, eksetera.

Avek sa bann prodwi, sa artis ki’n devlop en bon repitasyon konman en pti lantreprener i dir ki apard bann pent, i kapab satisfer tou lezot kliyan parey bann dekorater, lekol ki ansenny lar e menm zanfan.

Son fourniser Sidafriken, en lakonpannyen ki apel ‘Dala’, in menm swazir li konman son sel reprezantan dan Losean Endyen.

‘The Palette’ i ouver Lendi ziska Sanmdi, ant 9er bomaten ek 3er30 apremidi.

 

 

 

 

 

» Back to Archive