En aksidan ki ti’n kapab vin grav |11 February 2016

Keksoz ti a’n kapab vin grav pre kot laboutik Cash & Carry Beau Vallon yer ver midi apre ki drayver en gro kanmiyon ki pou lakonpannyen petrol (Seypec) ti forse mont lo trotwar pour evite tap avek en pti pick-up ki ti pe vin dan direksyon opoze. Dan sa mannev, slab lo sa trotwar ti kase e bout devan kote gos sa kanmiyon ti anfons ladan e pri dan rigol.

Sa kanmiyon ti plen avek benzin ki i ti pe al delivre kot stasyon petrol Beau Vallon.

Dapre drayver sa kanmiyon ki ti tousel, i ti pe desann e en bis prive ti pe monte e vi ki ti annan travay fouye dan lot kote semen, sa bis prive ti ralenti akoz semen ti etrwat. Me par deryer sa bis, drayver en pti pick-up ti overtake en sel kou kot li drayver sa gro kanmiyon ti orn ek li pour li arete. Me i ti vini menm. E se a sa moman kot i ti esey negosye semen pour evit en kolizyon.

Vi ki ti napa personn lo trotwar sa letan i ti fer monte son kanmiyon en pti bout  anler me se la kot trotwar pa ti kapab tenir sa pwa e slab ti kase.

Touzour dapre drayver sa kanmiyon, sa pti pick-up ti kontiny son larout san arete.

Ti en pe plis ki 3erdtan plitar, savedir ver 3er30 apremidi, ki sa kanmiyon ti arrive ganny tire kot i ti’n pri.

Erezman en lot kanmiyon ti ganny anvoye byen boner pour tir petrol dan sa enn ki’n fer aksidan e al delivre li.

Eski ou kapab mazinen kwa ki ti’n kapab arive si sa gro kanmiyon ek son kargezon petrol ti’n eksploze swivan sa aksidan?