Follow us on:

Facebook Twitter LinkedIn YouTube

Archive -Seychelles

Komemorasyon Lazournen Kanser: |06 February 2016

Vincent Milihuis gran venker konpetisyon poezi

 Vincent Milihuis i gran venker konpetisyon poezi ki lasosiasyon Bling Bling Poetry in organize alokazyon Lazournen Kanser 2016, an kolaborasyon avek Cancer Concern Association.

Sa konpetisyon ti ouver dan 4 kategori – 6-an a 12-an, 13-an a 16-an, pos segonder ek adilt. En senkantann poet in partisipe an tou, e tyermenn Bling Bling, Tony Joubert alias Ras Pyek ki osi en poet koni, in dekri sa konman en sikse.

Poet Vincent Milihuis ki osi fame konman en rakonter e ekriven zistwar kourt ti sorti premye dan kategori adilt avek son poenm Tou pa fini la’.

Vincent in rakonte ki se o dernyen moman ki i ti deside pour partisip dan konpetisyon, e vi ki i ti kot en zanmi sa letan, i ti demann li pret en papye ek en bolpenn. I azoute ki i ti a sa moman konfyan ki i ti pou gannyen, «akoz tou sa ki Milihuis i fer i byen».

Dezyenm pri dan kategori adilt in al pour Rick Capricieuse avek son poenm ‘Ou ki pe viv avek kanser’. Eugenia Albert in ganny trwazyenm pri pour son poenm ‘Ou pa tousel’. Edwin Henriette in lo son kote ranport en mansyon spesyal avek poenm ‘Non mon pa pou sede’.           

Avek poenm ‘Temwanyaz en lalit’, Shadia Coopoosamy i gannyan dan kategori pos segonder. Dezyenm pri dan sa kategori in al pour Ivan Vidot avek ‘Mon annan lespwar’. Hazel Volcy in ranport trwazyenm pri pour poenm ‘Annan en leker’.

Lezot venker dan bann lezot kategori i konm swivan.

13-an a 16-an: 1e: Tanya Arissol – ‘Cherish memories’; 2enm:  Guyra Savy – ‘A new beginning’; 3enm: Neela Ernesta – ‘Life goes on’; Mansyon spesyal: Cherif Benstrong – ‘My recipe’.

6-an a 12-an: 1e: Valery Bibi – ‘Cancer my worst enemy’; 2enm: Anna-Marie Bibi – ‘The journey of destiny’; 3enm: Lyandra Louise – ‘A fight against cancer’; Mansion spesyal: Alicia Labrosse – ‘A departed friend’.

Bann gannyan ti resevwar zot pri dan en pti seremoni ki ti fer kot Exiles Club yer swar. Ziri ki ti ziz konpetisyon ti konpri ansennyan, poet e osi bann dimoun ki’n ganny afekte avek kanser.

Ras Pyek in eksplike ki atraver sa konkour, Bling Bling Poetry in oule montre ki lapoezi i kapab en terapi pour bann maladi ou lezot sitiasyon difisil. In anonse ki Bling Bling Poetry ek Cancer Concern Association pou organiz ankor sa konpetisyon lannen prosenn, e safwasi zot pou travay pli pre avek bann lekol.

 

 

 

 

» Back to Archive