Komemorasyon lazournen kanser i demar avek en lamars |06 February 2016

Le 4 Fevriye ti Lazournen Enternasyonal Kanser. Depi en pe letan deza, Lasosiasyon ‘Cancer Concern’  i komemor sa lokazyon avek en Lasemenn Kanser, an kolaborasyon avek Minister Lasante.

Sa lannen, aktivite pour mark sa lazournen i deroul pandan trwa zour. I ti konmanse Zedi avek en lamars an solidarite avek bann dimoun ki pe viv avek kanser. Lamars ti konmans kot Lopital Sesel e al fini avek lapriyer kot Katedral St. Paul.

Lamars ti dirize par en group travayer lakonpannyen petrol Sesel (Seypec). Avan konmans marse, en reprezantan sa lakonpannyen ti fer en donasyon finansyel anver Cancer Concern. Tyermenn sa lasosiasyon, Levek French Chang-Him ki ti osi beni lamars e demann Bondye pour ede trouv en gerizon pour sa maladi, ti fer remarke ki atraver sa donasyon, Seypec ti fer tenm Lazournen Kanser pour sa lannen – ‘Nou kapab, Mon kapab' – vin en realite.

Lezot partisipan ti sorti dan bann lorganizasyon parey Minister Lasante, Minister Ledikasyon, Biro Lenvestisman Sesel (SIB), Konsey Nasyonal Lazenes (SNYC), Lekol Segonder Beau Vallon, Klib Soroptimist, Island Vibes ki en group zenn La Digue, parmi lezot.

Minis pour Lasante Mitcy Larue ti remersye Cancer Concern ek lezot partner parey Seypec ek Rotary Club pour sipor ki zot donn Minister Lasante dan lalit kont kanser.

I ti fer rapel ki sa maladi napa frontyer e ki i kapab tous nenport ki.

I ti dir i enportan ki bann pasyan i resevwar sipor lasosyete an antye pour zot viv en lavi normal e reganny zot lasante.

Minis Larue ti met lanfaz lo tenm pour sa lannen ki i ti dir i enportan akoz lasante pa zis responsabilite Minister Lasante, me osi responsabilite nou tou.

Sa ti osi lokazyon pour li fer rapel slogan sa minister – ‘Mon lasante i mon responsabilite, i konmans dan lakour’.

«Nou konportman pou ed nou annan en meyer lasante e redwir risk ganny kanser,» Madanm Larue ti dir, menm si i ti azoute ki «tretman i la e ou kapab reganny ou lasante».

I ti azoute ki pour sa arive, i enportan ki sak dimoun i konn son lekor e raport okenn abnormalite ki i dekouver.

Sa i dir a permet deteksyon boner e fasilit gerizon.

Vis-tyermenn Cancer Concern Josie Michaud-Payet, ti lo son kote dir ki sa tenm ‘Nou kapab, Mon kapab’ i montre kwa ki nou kapab fer konman endividi, kominote ek gouvernman pour lit kont kanser.

I ti azoute ki mesaz pour sa lannen se fer en aksyon pozitif dan sa lalit.

I ti fer rapel bann aksyon ki Lorganizasyon Mondyal Lasante i demande pour kapab fer en bon swa e zouir en bon lasante. Sa i enkli : edik nou lekor lo bann risk ek sentonm e fer deteksyon boner e ed bann ki malad dan nenport fason posib.

Si ou malad i ti dir, demann sipor e pa kasyet, kontinyen kontan e aksepte lanmour, pa sanz ou personalite, retourn travay apre tretman e partaz ou leksperyans avek lezot.

«Sa i en swa ant lavi ek lanmor. Nou pa devret viv e eksperyans sa maladi nou tousel. Kanser nepli devret en size tabou,» i ti dir.

Anmenmtan ki lamars ti pe deroule lo Mahé, ti osi annan enn lo Pralen e en lot lo La Digue.

Komemorasyon Lazournen Kanser i kontinyen ozordi avek en demi zournen aktivite kot Katedral St. Paul.