Follow us on:

Facebook Twitter LinkedIn YouTube

Archive -Seychelles

MCB i fer donasyon a Fondasyon Leritaz |28 November 2015

Mauritius Commercial Bank (MCB) in fer en donasyon triko avek bann Klib Leritaz dan bann lekol.

Se direkter zeneral MCB, Bernard Jackson, ki ti fer sa donasyon avek sef egzekitif Fondasyon Leritaz Sesel(SHF) Miera Savy, pandan en pti seremoni kot sa labank yer apremidi.

Sa ti dan prezans direkter zeneral pour Kiltir, Marcel Rosalie, lezot travayer SHF ek MCB e bann zanfan ki manm Klib Leritaz.

Msye Jackson ti dir ki sa donasyon i montre lenplikasyon MCB dan kominote e dan proteksyon patrimwann Sesel.

I ti azoute ki sa labank i bokou enplike dan proteksyon patrimwann ek larises istorik larezyon.

«Meyer fason pour protez sa se siport zefor SHF pour promouvwar konnesans ek prezervasyon patrimwann istorik e kiltirel Sesel,» Msye Jackson ti dir.

I ti demann bann manm Klib Leritaz pour met sa bann triko avek lafyerte e montre zot langazman dan proteksyon nou leritaz.

Madanm Savy ti remersye MCB pour sa kontribisyon e pour son partisipasyon dan proteksyon leritaz.

I ti dir ki sa partenerya piblik-prive i enportan akoz i ofer en lasirans konsiderab pour lavenir.

I ti azoute ki atraver sa donasyon, bann zenn, ki in apel bann anbasader natirel, a ganny lokazyon pour pli byen apresye e prezerv sa patrimwann vivan pour fitir zenerasyon.
 
Madanm Savy ti konklir ki i konvenki lo rol kiltir dan devlopman pei e ki sa bann zanfan, atraver Klib Leritaz, a kapab kontribye dan sa devlopman.  

I ti fer lapel a lezot biznes ek lorganizasyon pour kontribye dan sa ki in apel nou zoli patrimwann.

 

 

 

» Back to Archive