SNP i koz lo son plan pour Praslin ek La Digue |28 November 2015

Dan en rankont avek lapres yer apremidi kandida prezidansyel Seychelles National Party (SNP) Msye Wavel Ramkalawan e osi kandida pour pos vis-prezidan Msye Roger Mancienne ti koz lo serten pwen ki zot pou adres premye dan zot progranm  lo Praslin ek La Digue si SNP i ranport eleksyon prezidansyel semenn prosenn.

Msye Ramkalawan ti eksplike ki sa rankont avek lapres i sa aktivite ki zot in swazir pour kouver sa de zil dan kad bann kanpanny politik akoz SNP pa’n deside fer en rali politik ni lo Praslin ni lo La Digue.

I dir zot in fini vizit Praslin e zot pe al La Digue semenn prosenn kot zot pou fer vizit port-a-port (door to door).

«Nou’n santi ki i pou bokou pli apropriye pour nou koz dan en fason konkret e kalm lo egzakteman ki plan ki nou annan pour Praslin e pour la Digue,» Msye Ramkalawan ti eksplike.

I dir SNP i konsider prezervasyon sa de zil e tou nou bann zil an zeneral konman tre enportan. Pour Praslin ek La Digue i dir i enportan ki zot kote ekolozik e osi lanvironnman otan ki posib zot kapab ganny prezerve anmezir ki sa bann zil i ganny devlope pour donn popilasyon en meyer lavi.

«Praslin i tre pre avek nou leker e lo kote imen dan bann deklarasyon ki’n ganny fer dernyenman lazenes Praslin in ganny ekspoze konman en lazenes anba en kantite difikilte, kot plis ki 60% bann zenn pe ganny afekte avek drog ek lalkol e bokou lezot pa oule retourn Praslin ler zot in fini etidye,» Msye Ramkalawan ti eksplike an dizan ki sa i tonb byen anliny avek progranm zeneral SNP ki pou target problenm drog.

«Nou espere ki sa i ava sov bann zenn lo Praslin kont sa fleo pour ki zot ava vin bann zanfan normal e bann paran i ava santi zot libere e lafanmir i ava reganny son stabilite,» i ti eksplike.
Parmi bann lezot keksoz spesifik ki SNP pe propoze pour Praslin i enkli:

• Devlopman Praslin kot lanmwatye larzan ki ganny ranmase atraver Vallée de Mai i ganny garde lo Praslin pour devlopman dan kominote.

• Ki CSR taks peye par bann gran lotel i reste lo Praslin ankor pour devlopman sa zil e sa larzan ava ganny zere par en bord Fon Devlopman Praslin ki ava ganny elekte

• Met lanfaz lo striktir bann semen e reouver semen ki sorti Grand Anse, pas Bel Air e tonb Pasker avek bi koup kantite letan ki dimoun i bezwen voyaze par anviron 30 minit

• Ouver semen Anse Lazio, Cherimont atraver Anse Kerlan pour ki i ava annan en ring road otour Praslin pour benefis plis bann fermye Zimbabwe ki pa pou bezwen fer en gran letour pour al Amitié

• Revwar atraver resers ki leta lasante bann zabitan ki reste obor stasyon elektrisite ki pe soufer avek polisyon e osi repozisyonn sa stasyon elektrisite

• Ankouraz zabitan pour prodwir zot prop elektrisite

• Reviz limit lo konstriksyon par lao 50 met pour bann rezidan konstrir zot lakaz

• Met lanfaz lo bon proze e rezervwar delo potab pour sa zil.

Pour sa ki konsern La Digue Msye Mancienne i dir enn parmi bann size enportan lo plan SNP pour sa zil i later.

«La Digue i donn nou en bon legzanp kot propriyete Leta in ganny divize e partaze ant zanmi dan en fason ki pa apropriye ki nou bezwen zis apel koripsyon,» Msye Mancienne ti eksplike e i ti donn legzanp sa ki’n arive L’Union Estate.

I dir ki ozordi dimoun La Digue zot in perdi zot leritaz natirel parey later e zot pa ni menm okouran ki pe pase.

In demann bann zabitan La Digue pour pa les zot ganny enflianse par bann pti kado zis avan eleksyon me pour plito vot pour en gouvernman ki serye.

I dir en gouvernman SNP pou revwar later ki reste lo sa zil e anmenn en polisi ki pli zis e donn priyorite zabitan La Digue.

I dir parey Praslin, Bord Devlopman La Digue osi in kasyet plizyer keksoz e in fèl popilasyon sa zil me en gouvernman SNP pou refer sa bord konpletman.

Taks CSR ek lezot fees pou reste pour devlopman La Digue. SNP pou devlop L’Union Estate dan en sant latraksyon pour touris avek en mize listwar natirel, e mize kiltirel pour fer li en vitrin pour kiltir La Digue e kiltir Kreol.

I dir SNP pou asiste tou Digwa dan zot demars pour ganny lenstalasyon lenerzi soler pour zot lakaz ek biznes, revwar sistenm drenaz, regilasyon planing, devlopman por lo sa zil ki i dir i anretar lo son devlopman, revwar laranzman pour bann yot, proze en nouvo lopital pour sa zil.

Le de kandida sa parti i dir en ladministrasyon SNP pou travay dan lentere tou dimoun lo sa de zil.