‘Sereng son Serenge’ en nouvo komedi par Joseph ek Vurna |27 November 2015

Pour bokou dimoun ler zot antann nonm Joseph ek Vurna dan en lot komedi zot pou zis riye sirtou si zot in vwar sa de zans dan bann pyes parey ‘Karikatir dan lanatir’, ‘Kataplas dan kalbas’, e osi ‘Dekalaz dan balizaz’. La zot pe vin avek en lot komedi pli fer riye ankor – ‘Sereng son Serenge’.

Sa komedi pou zwe pour premye fwa pour piblik ozordi dan oditoryonm Liniversite Sesel Anse Royale apartir 7er30 diswar e tiket i deza anvant dan bann landrwa labitid e i kout 150 roupi.

Dan en pti konversasyon avek Joseph Sinon pli boner sa semenn, in eksplike ki i pa’n pran li bokou letan pour met sa pyes ansanm e ki apard li zot de Vurna, Najoie – ki bokou dimoun i deza konn li – pou en lot aktres e pou osi annan plizyer lezot akter ek aktres ki piblik pa konnen me ki Joseph i dir i asire pou enpresyonn bann ki vin get sa pyes tanto.
Me kwa sa tit e ki i pe esey dir?

«Sa tit i abstre e i enkli en kantite keksoz ki zonm i fer dan lavi toulezour san ki i port gran latansyon lo la e apre i bezwen limenm riye,» Joseph ti eksplike.

I ti azoute ki i annan dimoun ki pas letan riy son prosen san realize limenm ki li osi i pa parfe e dimoun pe riy li.

Joseph ti eksplike ki sa pyes i pa pour enn ki annan en sel zistwar e ou vini ou gete, ou swiv apre i fini me i enn kot i annan diferan sketch/tablo ki tous diferan sityasyon lavi.

«I annan par egzanp enn ki montre dimoun ki’n bite dan lavi e keksoz ki zot bezwen fer pour sirviv. En lot i adres sityasyon dan lavi ler en dimoun i al dan en biro pour rod en servis me i bezwen led e la i arive ki swa sa zofisye pa konpran li oubyen pa anvi konpran li e kwa ki swiv apre,» Joseph ti eksplike.

I dir i annan osi bann senaryo ki deroul swa dan en restoran ou dan landrwa piblik.

Joseph pa ti tro tro anvi devwal tro bokou lenformasyon lo sa pyes me i ti zis dir ki tou son bann fán ek lezot manm piblik ki anvi vin riy zot vant plen la i en lot sans pour zot fer li.

Apre pyes ‘Lasaler dan kalorifer’ ki Joseph i dir piblik ti byen apresye, i pe promet ki sa enn pyes pou osi fer dimoun byen riye me anmenmtan fer nou reflesir lo bann diferan sityasyon lavi toulezour.